Kujtimet e hidhura të vitit 2020: Lewandowski ende nuk e fal anulimin e “Topit të Artë”

Sulmuesi polak, Robert Lewandowski, vazhdon ta mbajë në mendje zhgënjimin e madh për vendimin e paprecedentë të vitit 2020, kur prestigjiozi “Top i Artë” u anulua për shkak të pandemisë. Detajet e këtij episodi janë bërë publike nga Pascal Ferre, ish-drejtori i revistës “France Football” dhe njeriu përgjegjës për këtë çmim. Dukefolur në emisionin “Le Vestiaire”, Ferre pranoi se vendimi për të anuluar ceremoninë e vitit 2020 për shkak të ndërprerjes së garave të futbollit nga COVID-19 ka qenë çasti më sfidues në karrierën e tij. Ai shtoi se kushtet për një vlerësim të drejtë të lojtarëve thjesht nuk ekzistonin në atë periudhë. Ish-zyrtari i lartë tregoi se e kishte njoftuar personalisht sulmuesin, i cili në atë kohë po kalonte një formë të jashtëzakonshme, por reagimi i tij nuk ishte aspak i lehtë. Sipas Ferre, Lewandowski nuk e priti mirë këtë vendim dhe, në çdo takim të mëvonshëm, i drejtohej me humor thumbues: “Ja ku është njeriu që refuzoi të më jepte ‘Topin e Artë’.” Vlen të theksohet se në vitin 2020, ylli polak ishte motori kryesor i Bayern Munich, duke fituar Ligën e Kampionëve, Bundesligën dhe Kupën e Gjermanisë. Statistikat e tij flisnin vetë: 55 gola dhe 10 asiste në vetëm 47 ndeshje, ndërsa u kurorëzua edhe si golashënuesi më i mirë në arenën vendase dhe evropiane. Megjithëse një vit më vonë ai u rendit i dyti pas Lionel Messit në të njëjtin kompeticion, shija e hidhur e humbjes së mundësisë së artë në vitin 2020 ka mbetur e pashlyer në kujtesën e bomberit polak.