Tragjedi familjare në Itali: I riu shqiptar dyshohet se ekzekutoi me thikë nënën e tij

Një ngjarje e rëndë ka tronditur qytetin e Chiarit, në provincën e Breshias në Itali, ku një 21-vjeçar shqiptar dyshohet se i ka marrë jetën me thikë nënës së tij, 39-vjeçares Meleqe Lusha. Menjëherë pas kryerjes së aktit të rëndë, i riu është larguar nga banesa, për t'u dorëzuar më pas vetë pranë autoriteteve vendase. Krimi i rëndë është regjistruar mbrëmjen e kaluar brenda apartamentit familjar, i vendosur në rrugën Via Tagliata. Sipas informacioneve nga autoritetet italiane, ka qenë pikërisht i riu, i identifikuar si Eduart Xhani, ai që ka njoftuar policinë për ngjarjen tronditëse. I dyshuari, i cili ka lindur në San Bonifacio të Veronës, është paraqitur gjatë orëve të mëngjesit në kazermat e Karabinierëve në Kremona, ku edhe është dorëzuar vullnetarisht përballë forcave të rendit. Pas sinjalizimit të dhënë, efektivët e policisë kanë ndërhyrë menjëherë duke u nisur drejt banesës së familjes, vend ku është konstatuar edhe trupi i pajetë i 39-vjeçares. Ndërkaq, ekspertët nga Seksioni i Hetimeve Shkencore pranë Komandës Provinciale të Karabinierëve në Breshia kanë kryer ekzaminimet e duhura në vendin e ngjarjes, me qëllim sigurimin e provave materiale dhe zbardhjen e plotë të dinamikës së krimit. Grupi hetues po vijon angazhimin intensiv për të hedhur dritë mbi rrethanat e plota të kësaj ngjarjeje tronditëse dhe për të kuptuar motivet e sakta që çuan në këtë tragjedi brenda familjes. Në këtë fazë të hetimit, autoritetet italiane nuk kanë dhënë ende detaje shtesë lidhur me shkaqet që sollën këtë situatë, ndërkohë që verifikimet dhe procedurat vijojnë.