Valë sulmesh kibernetike godet supermarketet në Evropë, mblidhet qeveria italiane në Palazzo Chigi

Agjencia Kombëtare e Sigurisë Kibernetike e Italisë ka lëshuar një thirrje urgjente drejtuar rrjeteve të mëdha tregtare, operatorëve të logjistikës ushqimore dhe kompanive të ftohjes industriale, duke u kërkuar atyre ngritjen e niveleve të mbrojtjes dixhitale pas një sërë sulmesh kibernetike në disa shtete të kontinentit. Sipas informacioneve nga media italiane, alarmi u dha pasi u regjistruan ndërhyrje kibernetike në sistemet e ftohjes të të paktën katër pikave të shitjes të rrjetit Coop në rajonin e Sicilisë, incident ky që solli prishjen e sasive të konsiderueshme të ushqimeve. Giuseppe Spadaro, drejtor i përgjithshëm i grupit Radenza që menaxhon supermarketet me brandin Coop, konfirmoi se shenjë e sulmit ranë tre dyqane të vendosura në Catania dhe një tjetër në qytetin e Palermos. Nëpërmjet ndërhyrjes, keqbërësit ndryshuan parametrat e temperaturës në pajisjet ftohëse, duke provokuar mbinxehjen e banakëve ku ruhen produktet ushqimore. “Sulmi ndodhi në orën 4 të mëngjesit. Po vlerësojmë dëmet. Në disa raste, e kemi zgjidhur problemin”, deklaroi Spadaro. Ai shtoi gjithashtu se ndërmarrja kishte njoftuar menjëherë Agjencinë Kombëtare të Sigurisë Kibernetike dhe kishte vënë në lëvizje protokollet standarde për nisjen e hetimeve të thelluara. Specialistët e policisë italiane për krimet kibernetike janë angazhuar në zbardhjen e burimit dhe përmasave të këtyre sulmeve, duke verifikuar nëse ekziston ndonjë lidhje me ngjarje të ngjashme të shënuara në zona të ndryshme të Evropës. Në këtë kuadër, një mbledhje e posaçme e drejtuar nga Alfredo Mantovano, nënsekretar pranë kryeministrit, është planifikuar të zhvillohet të martën në ambientet e Palazzo Chigi. Në këtë takim pritet të marrin pjesë krerët e strukturave të inteligjencës italiane, si dhe drejtori i Agjencisë së Sigurisë Kibernetike. Fenomeni i sulmeve të ngjashme është shtrirë në të gjithë hapësirën evropiane, ku incidentet pasojnë ndërprerjet e regjistruara në sistemet e ftohjes përgjatë Belgjikës, Suedisë, Luksemburgut, Estonisë, Holandës dhe Irlandës. Në Belgjikë, prokurorët federalë kanë hapur një hetim zyrtar pasi supermarketet sinjalizuan se autorët kishin aktivizuar nga distanca modalitetet e shkrirjes, duke detyruar temperaturat në pajisjet e ftohjes të kapërcejnë kufijtë e lejuar rregullatorë. Ndërkohë, Komisioneri i Bashkimit Evropian për Bujqësinë dhe Ushqimin, Christophe Hansen, i cilësoi ngjarjet e ndodhura si “një përpjekje të qëllimshme për të ndërprerë zinxhirin tonë të furnizimit me ushqime dhe për të minuar besimin e konsumatorëve”. Hansen bëri të ditur se do ta trajtojë këtë shqetësim drejtpërdrejt me kolegët e tij komisionerë gjatë mbledhjes së ardhshme.