Sulmuesi i Arsenalit lëshon akuza të forta ndaj yllit të Liverpoolit: U mundua të më nxirrte me karton të kuq

Anësori i Arsenalit, Noni Madueke, ka drejtuar akuza të hapura ndaj mesfushorit të Liverpoolit, Alexis Mac Allister, duke e akuzuar se është përpjekur ta provokojë qëllimisht për ta detyruar gjyqtarin ta ndëshkonte me karton të kuq, gjatë triumfit të skuadrës londineze në udhëtim fundjavën e kaluar. Futbollisti pranoi se kishte pasur frikë se mos përjashtohej para kohe nga fusha e blertë. Ngjarja tensionuese mes dy lojtarëve ndodhi në fraksionin e dytë të sfidës në “Anfield”, të cilën “topçinjtë” e mbyllën në favor të tyre me rezultatin minimal 1-0. Përplasja fizike kokë më kokë detyroi sistemin VAR të ndërhynte dhe të shqyrtonte rastin për një mundësi të mundshme kartoni të kuq ndaj anësorit të Arsenalit për shkak të një reagimi të tensionuar. Duke komentuar këtë episod të diskutueshëm pas ndeshjes, Madueke u shpreh se situata u ekzagjerua pa nevojë: “Sinqerisht, nuk mendoj se ishte ndonjë gjë e madhe. Gjyqtari nuk e vlerësoi si karton të verdhë apo të kuq, madje as VAR. Pra, të gjithë ramë dakord për këtë”. “Ishte një lëvizje e natyrshme dhe Mac Allister është padyshim i zgjuar. Ai u përpoq të më provokonte që të merrja një karton të kuq. Të jem krejtësisht i sinqertë, në mendjen time mendova: ‘Epo, me VAR-in, gjithçka është e mundur‘”, shtoi më tej sulmuesi i skuadrës nga Londra. “Gjithçka varet nga mënyra se si interpretohet situata. Nuk e di se çfarë menduan ata. Por, për fat të mirë, nuk ndodhi“, përfundoi deklaratën e tij lojtari i Arsenalit.