Përplasja në distancë, Kërçeli i kthen përgjigje Ramës: Veprimet tona ndaj kryeqytetit udhëhiqen nga dashuria dhe llogaridhënia

Deputeti i Lëvizjes Vetëvendosje, Ilir Kërçeli, i është kundërpërgjigjur ashpër kryetarit të Komunës së Prishtinës, Përparim Rama, pas reagimit të këtij të fundit lidhur me aksionin e ndërmarrë nga kjo parti para ndërtesës së Prokurorisë. Nëpërmjet një deklarate publike, Kërçeli ka theksuar se aktivitetet e tyre nuk nxiten nga motive apo rivalitete politike, por përfaqësojnë një angazhim të sinqertë për mbrojtjen e parasë publike dhe transparencë institucionale ndaj çdo abuzimi të mundshëm. Gjatë reagimit të tij, ai ka vënë në dukje edhe mbështetjen financiare që ekzekutivi qendror i ka siguruar kryeqytetit për jetësimin e projektit strategjik të Unazës së Jashtme. "Përparim, shpejt paske reaguar! Më vjen mirë që po na përcjell edhe në konferenca. Përparim, këtu nuk ka inate politike, por vetëm: 1. Dashuri për kryeqytetin. 2. Vigjilencë ndaj mënyrës se si shpenzohen taksat e qytetarëve të kryeqytetit. 3. Sinjalizim të çdo parregullsie. Dhe, në fund, natyrisht, kërkesë për përgjegjësi nga kushdo që keqpërdor taksat e qytetarëve të kryeqytetit", ka shkruar ndër të tjera Kërçeli. Në mbyllje të reagimit të tij, ai ka kujtuar se vetëm një ditë më parë, Qeveria e Republikës së Kosovës ka ndarë fondet e nevojshme për finalizimin e projektit të Unazës së Jashtme të Prishtinës.