Tragjedi familjare në Itali: 21-vjeçari shqiptar ekzekuton me thikë nënën e tij dhe dorëzohet në polici

Një ngjarje e rëndë ka tronditur opinionin publik në qytetin e Chiarit, në provincën e Breshias, ku një i ri shqiptar dyshohet se i ka marrë jetën me thikë nënës së tij, 39-vjeçares Meleqe Lusha. Pasi ka kryer krimin e rëndë, ai është larguar përkohësisht nga vendi i ngjarjes dhe më pas është dorëzuar vetë pranë organeve kompetente. Krimi i rëndë u regjistrua gjatë natës së kaluar brenda banesës familjare, e cila ndodhet në rrugën Via Tagliata. Sipas të dhënave zyrtare, ka qenë vetë autori i dyshuar, i identitetit Eduart Xhani, ai që ka ndërmarrë hapat për të njoftuar autoritetet për aktin e rëndë që kishte ndodhur. I riu, i cili ka lindur në San Bonifacio të Veronës, është paraqitur gjatë orëve të para të mëngjesit në kazermat e Karabinierëve në Kremona, ku ka zgjedhur të dorëzohet vullnetarisht para efektivëve të rendit. Menjëherë pas alarmit të dhënë, shërbimet e policisë kanë shkuar me urgjencë në apartamentin ku ndodhi ngjarja, ku edhe kanë konstatuar trupin e pajetë të gruas 39-vjeçare. Ndërkohë, ekspertët e Seksionit të Hetimeve Shkencore pranë Komandës Provinciale të Karabinierëve të Breshias kanë ndërmarrë veprimet e nevojshme në vendngjarje, duke kryer këqyrjet përkatëse me qëllim sigurimin e provave materiale dhe zbardhjen e plotë të dinamikës së krimit. Grupi hetues është angazhuar intensivisht për të hedhur dritë mbi rrethanat e kësaj tragjedie familjare dhe për të zbuluar motivet e sakta që shtynë 21-vjeçarin drejt këtij akti ekstrem. Derimë tani, autoritetet italiane nuk kanë bërë publike detaje apo hollësi shtesë lidhur me shkaqet që çuan në këtë ngjarje tronditëse, ndërkohë që hetimet vazhdojnë.