Kriza në Policinë e Kosovës, deputeti Ramadani kërkon dorëheqjen e ministrit Sveçla

Deputeti i AAK-së, Burim Ramadani, ka ngritur shqetësime serioze lidhur me gjendjen aktuale në Policinë e Kosovës, duke kërkuar llogaridhënie të menjëhershme dhe dorëheqjen e ministrit të Punëve të Brendshme, Xhelal Sveçla. Në reagimin e tij, Ramadani ka vënë në pah sfidat e shumta me të cilat po ballafaqohen efektivët e rendit, duke filluar nga mungesa e elementeve bazë të uniformës, e deri te dështimet në sigurimin e kushteve minimale për punë. "Ministri Sveçla duhet të japë dorëheqje, mjaft u dëmtua Policia! Nuk po munden t'u sigurojnë as kapele, as goma dimri për automjetet zyrtare, as uniforma të mjaftueshme, e lëre më pajisjet bazike. Për më tepër, policët detyrohen t'i drejtohen gjykatave për pagat shtesë, ndërsa sigurimi shëndetësor, transporti dhe shujtat e organizuara mbeten ende fjalë në letër", ka shkruar Ramadani në rrjetet sociale. Më tej, ai ka theksuar se strukturat policore nuk kanë kaluar në procese gradimi për afro një dekadë, ndërkohë që mungojnë investimet e duhura buxhetore për sektorin operativ dhe autonomia e nevojshme në këtë fushë. "Kjo është panorama e Policisë pas një qeverisjeje të dobët nga ana e Sveçlës. Ai ka dëshmuar paaftësi në këtë dikaster, duke cenuar rëndë pavarësinë dhe funksionimin ligjor e operacional të forcave të rendit", ka përfunduar Ramadani.