Akuza të forta ndaj qeverisë: Si u përdor ministri i Drejtësisë për të çuar mesazhe kërcënuese në qeli

Anëtari i Kryesisë së Partisë Demokratike, Grigels Muçollari, ka lëshuar akuza të ashpra ndaj qeverisë, pas vizitës së ministrit të Drejtësisë, Toni Gogu, në qelinë e kryebashkiakut të Tiranës, Erion Veliaj, në institucionin e ekzekutimit të vendimeve penale në Fier. Sipas tij, kjo vizitë është shfrytëzuar për t'i përcjellë Veliajt një mesazh intimidues nga ana e kryeministrit Edi Rama. Në deklaratën e tij, përfaqësuesi i opozitës pohon se kreu i ekzekutivit i ka kërkuar kryebashkiakut të dorëzojë mandatin e tij nga burgu dhe të mos ndërmarrë lëvizje të tjera, në të kundërt do të përballet me pasoja të rënda ligjore. Muçollari e cilëson të papranueshme që një zyrtar i lartë, i ngarkuar me detyrën për të garantuar zbatimin e ligjit dhe drejtësinë, të kthehet në ndërmjetës të mesazheve politike me tonë kërcënuese brenda ambienteve të paraburgimit. Ndërkohë, nga ana e tij, ministri Toni Gogu ka pranuar se është takuar me Erion Veliajn ditën e premte, por i ka hedhur poshtë në mënyrë kategorike aludimet se ka transmetuar mesazhe shantazhi. Gogu është mbrojtur duke shpjeguar se takimi është realizuar në kuadër të funksioneve të tij zyrtare, për të inspektuar kushtet e jetesës së të paraburgosurit dhe për të dëgjuar shqetësimet e ngritura prej tij. Megjithatë, reagimi i plotë i Grigels Muçollarit vijon me tone edhe më të forta kritike: “Edhe korrier shantazhi, edhe pastor, edhe Ministër Drejtësie?! Bëmat e kupolës së Rilindjes kalojnë çdo fantazi. Sidomos kohët e fundit, pas destabilizimit total nga protesta, Edi Rama është plot me paranojë, ankth dhe mungesë të thellë racionaliteti në atë që bën. Në media del lajmi që Toni Gogu i përcjell në qeli Erion Veliajt kërcënimet e kreut të organizatës. Ngjarja bëhet e ditur nga avokati i kryebashkiakut. Edi Rama i kërkon të dorëzojë mandatin që e mban nga biruca dhe të rrijë urtë, ose do të kalbet në burg. Këtë mesazh mafioz, të paraburgosurit ia përcjell hiç më pak, por Ministri i Drejtësisë. Ditën është në zyrën ku i shërben drejtësisë, natën bëhet bashkëpunëtor në krim, me kapele dhe tuta, pa u regjistruar si vizitor. Lajmi ka që në mesditë që qarkullon në media. Toni Gogu, që është dhe pastor, pra me një moral të lartë, nuk ka dalë publikisht ta përgënjeshtrojë. Por nuk ka dhënë as dorëheqjen, vazhdon të jetë në zyrë. Si mundet vallë? Edhe mesazher i kumbarit, edhe Ministër Drejtësie?!”