Nga korriku i 2027-ës: Kurti paralajmëron ngritjen e koeficientit në 120 euro dhe pagën e 13-të

Kryeministri i Kosovës, Albin Kurti, gjatë mbledhjes së nëntë të ekzekutivit, ka bërë të ditur se Projektbuxheti për vitin 2027 do të sjellë ndryshime pozitive për sektorin publik, duke parashikuar ngritjen e koeficientit të pagave nga 110 në 120 euro, e cila do të hyjë në fuqi duke nisur nga 1 korriku i vitit të ardhshëm. Kreu i Qeverisë ka theksuar se, krahas kësaj lëvizjeje në koeficient, të punësuarit në institucionet publike do të gëzojnë edhe përfitimin e pagës së 13-të, e cila është planifikuar të ekzekutohet gjatë gjysmës së parë të vitit 2027. “Njësoj sikurse sivjet, buxheti i 2027 parasheh edhe në vitin tjetër pagën e 13-të, dhe krahas saj edhe rritjen e koeficientit të pagave në 120 euro nga data 1 korrik 2027. Pra, në pjesën e parë të vitit paga e 13-të, kurse në pjesën e dytë të vitit rritje e pagës për të gjithë nëpunësit që marrin pagë nga buxheti”, ka deklaruar Kurti. Sipas shefit të Qeverisë, fondi i përgjithshëm i ndarë për pagat do të kapë shifrën e 1 miliard e 85 milionë eurove. Duke e pjesëtuar këtë shumë me rreth 85 mijë punonjës të administratës dhe sektorit publik, i bie që paga mesatare vjetore bruto të kalojë shifrën e 12 mijë eurove. “Kjo e çon buxhetin e pagave në 1 miliardë e 85 milionë euro, e që kur pjesëtohet me rreth 85 mijë punonjës të publikut, paga mesatare vjetore bruto rezulton mbi 12 mijë euro, apo mbi 1 mijë euro bruto në muaj, gjë që nënkupton edhe përmbushjen e njërit nga premtimet tona për mandatin e radhës qysh në vitin e ardhshëm”, ka thënë Kurti, duke shtuar se ky trend i rritjes nuk do të ndalet me kaq, por do të vijojë edhe në periudhat në vijim. Gjatë fjalimit të tij, kryeministri u ndal gjerësisht edhe te ecuria e ekonomisë së vendit dhe parashikimet fiskale për vitin 2027, duke bërë të ditur se në tremujorin e parë ekonomia ka shënuar rritje prej 5.4 për qind, ndërsa në të dytin prej 4.1 për qind. “Sivjet, përkundër sfidave me të cilat po ballafaqohemi edhe ne, krahas gjithë botës, rritja ekonomike ka shënuar nivelet prej 5.4 dhe 4.1 për qind për tremujorin e parë dhe tremujorin e dytë përkatësisht. Kjo na vendoste vendet me rritjen më të shpejtë në rajon e më gjerë”, ka shpjeguar ai. Sa i përket arkës së shtetit për vitin e ardhshëm, Kurti njoftoi se buxheti i projektuar arrin në vlerë prej 4.27 miliardë eurosh, duke shënuar një diferencë prej 200 milionë eurosh më shumë krahasuar me buxhetin e rishikuar të vitit 2026, dhe 300 milionë euro më lart se buxheti bazë i këtij viti. “Për vitin 2027, buxheti i projektuar parasheh nivelin prej 4.27 miliardë euro, që është për 200 milionë euro më i lartë sesa buxheti i rishikuar i vitit 2026 dhe për 300 milionë euro më i lartë sesa buxheti bazë i vitit 2026”, ka deklaruar ai. Në fund, kryeministri bëri të ditur se nga ky fond total, plot 908 milionë euro do të shkojnë si mbështetje dhe financim direkt për komunat e vendit. “E nga ky buxhet, 908 milionë euro do të shkojnë si financim direkt për komunat. Ky është buxhet rekord edhe për komunat e Kosovës dhe kjo rritje vjen si rezultat i rritjes së vazhdueshme të granteve qeveritare”, ka përfunduar kryeministri Kurti.