Grabitje e armatosur në një bankë në Tiranë: Autori neutralizon rojën dhe largohet me skuter

Javës i është vënë kapaku me një ngjarje të rëndë në kryeqytet, pasi një person i maskuar dhe i armatosur ka vënë në shënjestër një bankë të nivelit të dytë në Tiranë, duke arritur të largohet me një shumë monetare që ende nuk është konfirmuar zyrtarisht. Ngjarja ka ndodhur të hënën, rreth orës 10:45, kur autori ka hyrë në ambientet e brendshme i veshur me të zeza, i pajisur me një skafandër në kokë, doreza dhe një çantë supi. Pasi ka kërcënuar me armë – ende e paqartë nëse ka qenë e vërtetë apo lodër – rojën private, ky i fundit është dorëzuar menjëherë duke u tërhequr drejt hollit, ndërkohë që autori është drejtuar me shpejtësi drejt sporteleve të arkës. Pas këtij sulmi, zona përreth dhe holli i bankës u rrethuan nga efektivët e policisë, të cilët mbajtën të bllokuar perimetrin për disa orë. Grupi hetimor ka siguruar dëshmitë kyçe të arkëtares dhe të rojes private, të cilat janë tashmë pjesë e dosjes hetimore. Nga këqyrja e pamjeve të kamerave të sigurisë, hetuesit kanë konstatuar se autori kishte vendosur doreza në duar, detaj ky që ka eliminuar mundësinë e gjetjes së gjurmëve papilare në vendngjarje. Megjithatë, kamerat e brendshme dhe dëshmitë e marra përbëjnë prova të rëndësishme për identifikimin e tij. Për kapjen e autorit, i cili pas krimit është larguar me një skuter elektrik, një grup i dytë hetimor po kreh zonën për të siguruar pamje shtesë nga kamerat e bizneseve rrethqarkëse. Ndërkohë, autoritetet policore bënë të ditur se ende nuk ka një shifër të saktë për dëmin financiar të shkaktuar gjatë kësaj ngjarjeje të ndodhur në zonën e Rrugës së Komunës së Parisit.