Zgjedhjet në Bërvenicë, Mexhiti: Mjaft me ndarje dhe retorikë përçarëse në shoqëritë multietnike

Pas mbylljes së procesit zgjedhor në Bërvenicë, bashkëkryetari i koalicionit VLEN dhe njëkohësisht kryetari i Komunës së Çairit, Izet Mexhiti, ka kërkuar qetësimin e skenës politike, duke vënë theksin te nevoja e rikthimit te bashkëpunimi dhe dialogu konstruktiv. Nëpërmjet një reagimi publik në rrjetet sociale, Mexhiti ka vlerësuar se fjalët dhe mesazhet nxitëse të përdorura përgjatë fushatës dhe pas saj përbëjnë thjesht një “folklor politik”. Ai ka kujtuar se procesi zgjedhor tashmë ka përfunduar dhe se qytetarët kanë treguar vullnetin e tyre të lirë përmes fletëvotimeve, duke shtuar se asnjë parti nuk ka pronësi mbi votat e qytetarëve, ndërkohë që kritikoi ashpër strategjinë e pozicionimit kundër të gjithëve. "Deklaratat nxitëse gjatë fushatës i kam konsideruar si folklor parazgjedhor. Në po atë frymë, deklaratat polarizuese që dëgjova mbrëmë dhe sot i trajtoj folklor paszgjedhor. Votat janë shprehje e lirë e vullnetit të qytetarëve dhe askush nuk i ka në pronësi ato. Në politikë, pozicionimi kundër të gjithëve nuk është strategji që çon drejt suksesit, por një qasje që herët a vonë prodhon zhgënjim. Në demokracitë multietnike nuk guxon të ekzistojë ndarje në ‘ne’ dhe ‘ata’, sepse kjo implikon pabarazi dhe tendenca për të suprimuar tjetrin", ka shkruar ai. Në vijim të reagimit të tij, Mexhiti ka theksuar se bisedimet dhe puna e përbashkët janë kusht i domosdoshëm për një mbarëvajtje shoqërore, aq më tepër në vendet me përbërje multietnike ku ky aspekt mbetet detyrim për të gjithë faktorët. Sipas tij, nuk ka vend për arsyetime dhe interpretime që shpërndahen sa herë që rezultatet nuk përkojnë me pritshmëritë e dikujt, pasi qytetarët janë ata që vendosin me votë, ndërsa politika duhet të mbajë përgjegjësi për hapat dhe vendimet e veta.