Humbja e mbi 43 milionë eurove nga BE, Aleanca cakton fajtorin: Papërgjegjshmëri qeveritare

Aleanca ka reaguar ashhpër ndaj skualifikimit të Kosovës nga përfitimi i fondeve të Bashkimit Evropian në vlerë prej 43.8 milionë eurosh, duke e vlerësuar këtë zhvillim si tregues të qartë të paaftësisë dhe mungesës së përgjegjësisë nga ana e Qeverisë së Kosovës. Nëpërmjet një deklarate të shpërndarë në rrjetet sociale, kjo forcë politike ka vënë në shënjestër mungesën e vizionit, kompetencës dhe llogaridhënies ekzekutive, duke nënvizuar se pasojat e këtyre dështimeve po rëndojnë drejtpërdrejt mbi supet e qytetarëve. "Përderisa çmimet rriten çdo ditë e bizneset po mbyllin dyert, Qeveria shënon edhe një dështim të radhës, humbjen e 43.8 milionë eurove nga fondet e Bashkimit Evropian", theksohet në reagimin zyrtar. Sipas Aleancës, ky dështim financiar nuk mund të arsyetohet si lëshim teknik apo vonesë administrative, por përbën papërgjegjësi të plotë dhe një goditje të rëndë për perspektivën e vendit. Po ashtu, ekzekutivi është kritikuar për ngecjet në sferën ekonomike, përkeqësimin e aleancave ndërkombëtare dhe ngujimin diplomatik të Kosovës. "Për fat të keq, faturën e këtij dështimi total nuk e paguajnë dështakët qeveritarë, por qytetarët e Kosovës!" Kujtojmë se vendi ynë ka mbetur pa 43.8 milionë euro nga Plani i Rritjes i Bashkimit Evropian, pasi dështoi të përmbushë gjashtë nga 13 detyrimet reformuese që kishin afat deri në qershor të vitit 2026, si pasojë e ngërçit politik. Kryenegociatori i Kosovës me BE-së dhe koordinatori kombëtar për Planin e Rritjes, Jeton Zulfaj, gjatë raportimit të tij para Komisionit për Integrim Evropian, bëri të ditur se nga 13 hapat e paraparë në afatin shtesë deri në qershor 2026, janë zbatuar vetëm shtatë prej tyre, ndërsa gjashtë të tjerë kanë mbetur pa u përmbushur në kohën e caktuar. Ai sqaroi se buxhetimi i përgjithshëm i Planit të Rritjes për Kosovën kap shifrën e 882.6 milionë eurove, ku dy të tretat përbëhen nga kredi të ndërlidhura me 111 hapa reformash, të cilat duhet të finalizohen deri në mbyllje të muajit gusht të vitit të ardhshëm. Pjesa më e madhe e reformave të prapambetura kushtëzoheshin me miratimin e nismave ligjore në Kuvend, pikërisht në një fazë kur ky dikaster ishte ende i pakonstituuar. Zulfaj ka paralajmëruar gjithashtu se deri më 31 dhjetor, institucionet e Kosovës duhet të përmbyllin edhe 22 hapa shtesë, në një vlerë prej 131.5 milionë eurosh, duke shtuar se dhjetë akte ligjore kërkojnë dritën jeshile të Kuvendit, ndërkohë që një pjesë e projektligjeve pritet të kalojnë procedurat nga Qeveria.