Valë revolte në Gjakovë: Shoqëria civile kërkon llogaridhënie institucionale për dhunën dhe vrasjet e grave

Për të ngritur zërin kundër dhunës me bazë gjinore dhe vrasjeve të grave, përfaqësues të organizatave joqeveritare në Gjakovë kanë organizuar sot një protestë paqësore, duke marshuar pranë tri institucioneve kyçe: Stacionit Policor, Gjykatës Themelore dhe Prokurorisë së këtij qyteti. Gjatë tubimit, Ideal Zhavel nga OJQ “Activism Root” u shpreh se ky organizim kishte për qëllim parësor ndërgjegjësimin dhe kërkesën e drejtpërdrejtë për llogaridhënie nga organet kompetente. Zhavel vuri në dukje se kanë kaluar tetë ditë të plota nga tragjkia ku u vra Arlinda Zekaj, ndërkohë që, sipas tij, ende nuk janë ndërmarrë veprimet e duhura ligjore ndaj autorëve kryesorë të këtij krimi. Nga ana e saj, Dorina Babuni Krelani, e cila përfaqëson OJQ “Medika”, theksoi se kjo protestë nuk përbën vetëm një thirrje për drejtësi institucionale, por edhe një apel urgjent drejtuar mbarë shoqërisë për një angazhim më të madh në çdo sferë të jetës publike dhe private, me qëllim ndalimin e kësaj dukurie alarmante.