Valë tërheqjesh masive prej 3.6 miliardë dollarësh në Binance pas sulmit më të madh kibernetik në histori

Klientët e platformës më të madhe në botë të tregtimit të kriptomonedhave, Binance, kanë nxjerrë jashtë llogarive të tyre shuma marramendëse fondesh, menjëherë pas rihapjes zyrtare të së dielës, më 1 nëntor. Platforma u rikthye në funksion pas një ndërprerjeje të detyruar nga një sulm kibernetik, i cili tashmë cilësohet si grabitja më e madhe e aseteve dixhitale në historinë e këtij tregu. Sipas të dhëjave të bëra publike, brenda një harku të shkurtër kohor, përdoruesit tërhoqën një vlerë neto prej 3.6 miliardë dollarësh, ndërkohë që drejtuesit e kompanisë po përpiqen të menaxhojnë situatën e krijuar nga ky incident që preku pasuri dixhitale me vlerë totale prej 6.3 miliardë dollarësh. Burime mediatike bëjnë me dije se agjenci të rëndësishme ndërkombëtare, ku përfshihet edhe Byroja Federale e Hetimit e Shteteve të Bashkuara (FBI), ia faturojnë këtë sulm kibernetik shtetit të Koresë së Veriut. Nga ana e saj, Binance ka njoftuar se ka arritur të sigurojë rikuperimin e rreth 95% të fondeve të grabitura, duke rikonfirmuar vendosmërinë për të kompensuar plotësisht çdo klient që ka pësuar humbje si pasojë e kësaj ngjarjeje. Kompania ishte detyruar të ndërpriste të gjitha transaksionet pas sulmit, para se të nishte rikthimin gradual të shërbimeve gjatë ditës së diel. Shifrat e publikuara nga vetë kompania ilustrojnë qartë fluksin e madh të kapitalit në momentin e rihapjes. Përmes një deklarate në platformën X, Binance sqaroi se midis orës 06:00 dhe 15:30 GMT më 1 nëntor, janë regjistruar tërheqje në vlerën e 4.649 miliardë dollarëve dhe depozita prej 1.01 miliardë dollarësh, çka solli një dalje neto prej afërsisht 3.64 miliardë dollarësh. Pas një vrulli fillestar, situata e tërheqjeve u qetësua dhe lëvizjet e kapitalit u stabilizuan sipas parashikimeve. Daljet neto të regjistruara gjatë të dielës përbëjnë pak më shumë se 2% të totalit prej 171 miliardë dollarësh të aseteve që gjenden nën menaxhimin e platformës. Javën e kaluar, kompania kishte bërë të njohur se kishte ndarë më shumë se 6.3 miliardë dollarë fonde për të përballuar pasojat e kësaj ndërhyrjeje të paligjshme. Megjithatë, sipas të dhënave të referuara nga platforma e analizave të kriptomonedhave DefiLlama, shifra e tërheqjeve nga përdoruesit llogaritet të ketë kapur vlerën e rreth 5 miliardë dollarëve. Për të mbuluar rreth 95% të aseteve të humbura, Binance është mbështetur në burime alternative financimi, ku përfshihen kapitali i vetë korporatës, fondi i sigurimit të derivateve dhe rezervat e emergjencës. Pavarësisht kësaj, drejtuesit kanë prauar se procesi i shlyerjes së plotë të shumës së mbetur mund të kërkojë më shumë kohë. Angazhimi i kompanisë mbetet i palëkundur për të mbuluar çdo pasojë financiare të këtij incidenti, ndërkohë që është njoftuar edhe rikthimi i tërheqjeve për mbi 24 kriptovaluta kryesore, përfshirë Bitcoin dhe Ethereum. Shërbimet e mbetura do të jetë funksionale gradualisht, pasi të jenë kryer të gjitha verifikimet e nevojshme të sigurisë. Pavarësisht masave të ndërmarra për të frenuar dëmet, autorët e sulmit vijojnë të zhvendosin fondet e vjedhura përmes strukturave komplekse të transaksioneve. Alec Zembrick, një nga drejtuesit e lartë të firmës së analizës së blockchain-it Chainalysis, e cila po bashkëpunon ngushtë me Binance dhe autoritetet qeveritare, deklaroi për programin Today të BBC-së se aktiviteti i pastrimit të parave është ende në zhvillim e sipër. Sipas tij, sulmuesit po i transferojnë këto pasuri përmes mijëra adresave dhe depozitave të ndryshme, një praktikë që vështirëson ndjeshëm përpjekjet për gjurmimin dhe rikuperimin përfundimtar të tyre.