Balla nga konferenca e BE-së: Reforma në drejtësi shembi pandëshkueshmërinë, fokusi tani te konsolidimi

Kryetari i Komitetit të Stabilizim-Asociimit BE–Shqipëri, Taulant Balla, e ka vlerësuar reformën në drejtësi si një nga dëshmitë më domethënëse të përparimit që vendi ynë ka bërë drejt Bashkimit Evropian. Gjatë fjalës së tij në Konferencën Ndërparlamentare për zgjerimin e BE-së dhe anëtarësimin e Shqipërisë, ai theksoi se ndryshimet kushtetuese dhe strukturat e reja të ngritura falë kësaj reforme i kanë dhënë sistemit fuqinë për të hetuar, ndjekur penalisht dhe gjykuar zyrtarë të niveleve më të larta. Sipas Ballës, pengesa kryesore e Shqipërisë në të kaluarën nuk ishte vetëm korrupsioni, por mungesa e institucioneve të pavarura dhe të fuqishme për ta luftuar atë. Ai nënvizoi se sistemi i vjetër dështonte të vepronte sa herë që shkeljet përfshinin individë me ndikim politik ose publik. Në këtë kuadër, ai vuri në dukje se drejtësia sot posedon kapacitete që dikur i mungonin, duke përfshirë aftësinë për t’iu përgjigjur shkeljeve dhe për të vetëpastruar strukturat e veta. Kreu i Komitetit të Stabilizim-Asociimit BE–Shqipëri kërkoi që mbështetja për institucionet e pavarura të drejtësisë dhe organet e specializuara kundër korrupsionit të mbetet e palëkundur, pa u ndalur përballë kostove politike apo pozitës së personave që mund të jenë në shënjestër të hetimeve. Megjithatë, Balla përsëriti se pavarësia e sistemit duhet të veprojë rreptësisht brenda kornizës kushtetuese dhe në mbrojtje të të drejtave themelore të njeriut. Ai shtoi se parimet si prezumimi i pafajësisë, procesi i rregullt ligjor, sekretgjykimi dhe respektimi i dinjitetit njerëzor duhet të udhëheqin punën e institucioneve. Duke u ndalur te e ardhmja, Balla specifikoi se faza e radhës e reformës do të ketë në fokus konsolidimin e arritjeve dhe rritjen e standardeve, duke siguruar njëkohësisht respektimin e garancive kushtetuese dhe evropiane. „Po ndërtojmë një sistem ku askush nuk është mbi ligjin dhe askush nuk është jashtë mbrojtjes së ligjit“, u shpreh ai gjatë fjalës së tij. Në fund, Balla bëri të ditur se synimi i Shqipërisë është mbyllja e negociatave të anëtarësimit deri në Krishtlindjet e vitit të ardhshëm, një objektiv që ai e quajti ambicioz. Ai i bëri thirrje parlamenteve të vendeve anëtare të BE-së që të mbështesin ratifikimin në kohë të traktatit të aderimit, duke kërkuar që ky proces të mos mbetet në fund të agjendave të tyre.