Haxhiu bën thirrje për mobilizim: Fokus maksimal te strategjia për mbrojtjen e krerëve të UÇK-së në Apel

Kryetarja e Kuvendit të Kosovës, Albulena Haxhiu, ka kërkuar që angazhimi institucional të përqendrohet fuqimisht në ndërtimin e një strategjie efektive, e cila do t'u vijë në ndihmë udhëheqësve të Ushtrisë Çlirimtare të Kosovës gjatë procesit gjyqësor në shkallën e Apelit në Hagë. Pas përfundimit të mbledhjes së Kryesisë së Kuvendit, Haxhiu theksoi rëndësinë e trajtimit të kësaj çështjeje me seriozitetin dhe profesionalizmin më të lartë, duke kujtuar se Komisioni për Legjislacion tashmë ka në dispozicion një afat prej katër javësh. Ajo gjithashtu konfirmoi se gjatë ditës do të zhvillojë një takim me kryetarin e këtij komisioni. Duke folur rreth këtij procesi, Haxhiu u shpreh: “Tashmë, Qeveria e Kosovës ka formuar grupin punues për hartimin e strategjisë dhe unë gjithnjë kam kërkuar që e gjithë vëmendja të zhvendoset pikërisht tek kjo strategji, që do të duhej të përpilohej në atë mënyrë që t’i shërbej krerëve të Ushtrisë Çlirimtare të Kosovës në shkallën e Apelit. Kam kërkuar vëmendje, seriozitet e profesionalizëm që vëmendja dhe puna jonë të zhvendoset tek kjo strategji. Unë e kam adresuar kthimin e ligjit te Komisioni për Legjislacion, i cili ka katër javë kohë. Unë do ta takoj sot kryetarin e saj për të parë qëndrimet”. Ndërkohë, sa i përket procedurave që duhet të ndiqen pas kthimit të ligjit, kryeparlamentarja bëri të ditur se ekzistojnë dy qasje të ndryshme nga ana e ekspertëve juridikë. Sipas saj, njëri grup juristësh konsideron se Kuvendi ka vetëm mundësinë e votimit ose mosvotimit të tij, ndërsa grupi tjetër mbron qëndrimin se janë të mundshme edhe ndryshimet përmbajtësore. “Ka dy interpretime nga juristët, një grup që thekson se pas kthimit të ligjit në lexim të tretë, ky vendim mbetet vetëm ta votojë ose të mos e votojë. Dhe grupi tjetër është që mund të bëjë ndryshime në këtë drejtim. I mbetet Komisionit për Legjislacion që ta trajtojë këtë çështje. Ju e dini që unë kam pasur një deklarim për këtë, por deklarimi im është i bazuar vetëm në një gjykim të Gjykatës Kushtetuese, në rastin e presidentes Atifete Jahjaga”, shtoi Haxhiu.