Zgjerimi i mafias shqiptare në Itali: Nga narkotikët te blerja e restoranteve në Venecia dhe lidhjet me “Ndranghetën”

Autoritetet italiane ngrenë alarmin se fitimet marramendëse nga trafiku i paligjshëm i lëndëve narkotike po pastrohen përmes investimeve në sektorin e hoteleri-turizmit, duke futur nën kontroll bare, restorante dhe biznese të ndryshme në qytetin e Venecias. Sipas vëzhgimeve të institucioneve ligjzbatuese në Itali, strukturat kriminale me origjinë nga Shqipëria nuk po mjaftohen më vetëm me tregtinë e drogës, por po shtrijnë rrënjët në ekonominë e ligjshme, duke krijuar gjithashtu aleanca të rrezikshme me organizata tradicionale mafioze. Investigimet e fundit mediatike në vendin fqinj hedhin dritë mbi praninë gjithnjë e më të fuqishme të këtyre klaneve në territorin venecian, ku ndikimi i tyre financiar dhe ekonomik po kthehet në një sfidë madhore për organet e rendit. Prej vitesh, organizatat kriminale shqiptare mbajnë primatin në furnizimin me shumicë të tregut të narkotikëve në zonë, kryesisht për sa i përket kokainës dhe marijuanës. Skema e funksionimit të tyre mbështetet te përdorimi i korrierëve lokalë për shpërndarjen në rrugë, ndërkohë që truri drejtues i këtyre rrjeteve shpesh operon nga jashtë territorit italian, duke komplikuar ndjeshëm identifikimin dhe goditjen e tyre nga drejtësia. Operacionet e ndërmarra gjatë vitit 2026 dëshmojnë shtrirjen ndërkombëtare të këtyre grupeve dhe bashkëpunimin e ngushtë mes policisë italiane, Policisë së Shtetit shqiptar dhe Interpoli-t. Në një nga goditjet më të bujshme, forcat e sigurisë arrestuan në Tiranë një 45-vjeçar shqiptar, i shpallur në kërkim që prej vitit 2022 si kreu i një rrjeti të dedikuar të importit të kokainës drejt Venecias. Një tjetër goditje e ndjeshme u finalizua në Dubai, ku u prangos një shtetas shqiptar 39-vjeçar, i kërkuar prej shtatë vitesh si udhëheqës i një organizate që shtrinte aktivitetin në Mestre, Noale, Scorzè, Noventa di Piave dhe Jesolo. Ndërkohë, në zonën e Spincias, policia ndaloi një 21-vjeçar me dy armë zjarri dhe rreth 370 gramë lëndë narkotike, ndërsa në zemër të Venecias, pranë zonës Frari, u zbulua një bazë për paketimin e kokainës, ku u arrestua një 30-vjeçar dhe u sekuestrua rreth një kilogram lëndë e bardhë. Sipas raporteve zyrtare nga Drejtoria Hetimore Antimafia (DIA) dhe ajo e Venecias (DDA), struktura e bazuar te lidhjet e ngushta fisnore dhe familjare mbetet pengesa kryesore për shkatërrimin e plotë të këtyre grupeve. Në vend të një hierarkie tradicionale, këto organizata përbëhen nga celula të lidhura ngushtë mes tyre, duke u shndërruar në një ndër kërcënimet më të mëdha të huaja për sigurinë në rajonin e Venetos.