Xhixho: Paketa e re fiskale dhe buxheti nuk sjellin ulje çmimesh, por rëndojnë xhepat e shqiptarëve

Deputetja e Partisë së Lirisë, Erisa Xhixho, ka hedhur akuza të ashpra ndaj qeverisë, duke e cilësuar paketën e re fiskale si një goditje të rëndë për qytetarët, e cila thellon varfërinë, ushqen dëshpërimin dhe shkatërron çdo shpresë për mijëra familje në vend. Ajo theksoi se këto masa do të përshpejtojnë shpopullimin dhe do të dëmtojnë rëndë shtresën e mesme, bizneset, profesionistët e lirë dhe familjet në nevojë. Sipas Xhixhos, kjo paketë do t'i zhvatë nga xhepat e qytetarëve plot 14 miliardë lekë shtesë për t'i çuar në arkën e shtetit. Duke iu referuar shifrave zyrtare, ajo shtroi pyetjen se përse i duhen qeverisë taksa të reja kur ajo nuk arrin të administrojë as fondet ekzistuese, ndërkohë që vendi regjistron miliarda lekë të pashpenzuara dhe dëme të rënda financiare. Ajo solli në vëmendje se të ardhurat për vitin 2026 i kaluan me rreth 221 milionë euro parashikimet fillestare, ndërsa Kontrolli i Lartë i Shtetit konfirmoi për vitin 2025 rreth 135 milionë euro dëm ekonomik dhe efekte negative financiare. Përfaqësuesja e opozitës vuri në dukje se një ekzekutiv që dështon në realizimin e investimeve publike, zgjedh të rrisë taksat mbi qytetarët dhe sipërmarrjen. Duke e quajtur buxhetin si arkë personale të kryeministrit Edi Rama, ajo renditi disa nga shkeljet e konstatuara në administrimin e fondeve publike, duke përmendur 168 milionë euro prokurime pa mbështetje të mjaftueshme financiare, kontrata tej mundësive buxhetore dhe pagesa për punë të pakryera. Po ashtu, ajo përmendi 53 milionë euro investime pa projekte konkrete dhe faktin se 188 projekte të planifikuara nuk nisën kurrë, ndërsa mbi 20% e shpenzimeve vjetore u kryen vetëm gjatë muajit dhjetor 2025. Keqmenaxhimi, sipas saj, është edhe më evident në Bashkinë e Tiranës, e cila gjatë vitit 2025 la pa realizuar rreth 151 milionë euro investime të parashikuara, duke shpenzuar vetëm 48% të fondeve. Për Xhixhomaninë, këto shifra dëshmojnë babëzinë e qeverisë për të grumbulluar para nga qytetarët dhe për t'ia shpërndarë klientëve të saj, ndërkohë që shërbimet bazë shëndetësore, arsimi dhe bujqësia janë lënë në harresë. Ajo theksoi se para në buxhet ka, pasi periudha janar-shtator 2026 shënoi një suficit rekord prej 772 milionë eurosh, por mungon vullneti dhe aftësia e qeverisë për t'i ridistribuar ato në mënyrë të drejtë. Xhixho përsëriti se paketa e re fiskale dështon të garantojë qoftë uljen e çmimeve, qoftë një menaxhim më të mirë të parasë publike. Sipas saj, ulja e TVSH-së në 6% për ushqimet bazë, në formën se është konceptuar, nuk do të reflektohet në ulje çmimesh për konsumatorët. Ndryshimet e tjera, si rritja e TVSH-së në 21%, rritja e tatimit mbi fitimin nga 15% në 17%, dyfishimi i tatimit mbi dividendin nga 8% në 15% dhe ulja e pragut të TVSH-së nga 10 milionë në 5 milionë lekë xhiro vjetore, do të rrisin evazionin dhe kostot administrative. Këto masa, përfundoi ajo, do të rëndojnë më tej çmimet për qytetarët që përballen me pagat më të ulëta në rajon, në një kohë kur gjysma e buxhetit familjar shkon vetëm për ushqime dhe mijëra familje mezi sigurojnë jetesën.