Sekondat e fundit të tmerrit: Si u rrëzua avioni në Florida që la pas 9 viktima

Komunikimi i fundit i pilotit me kullën e vëzhgimit ka zbardhur çastet e agonisë para se aeroplani tip Learjet 60 të pësonte aksidentin fatal në Florida, ngjarje që i mori jetën nëntë personave. Në kontaktet e para radiofonike, pak çaste para tragjedisë, drejtuesi i mjetit fluturues njoftoi se po përballej me kushte të vështira atmosferike, duke përmendur praninë e akullit, një temperaturë të jashtme prej -47 gradë Celsius dhe turbulenca që po sillnin paqëndrueshmëri në lartësi. “Kemi formim akulli të lehtë, të menaxhueshëm dhe të qartë dhe turbulencë të moderuar”, ishte raportimi i parë i pilotit drejt Kontrollit të Trafikut Ajror të Miamit. Megjithatë, situata mori kthesë fatale shumë shpejt. Pasi vuri re reshjet e shiut dhe kërkoi ndryshim të lartësisë, ai u detyrua të shpallte gjendjen e emergjencës. “Po humbasim lartësi me një shpejtësi prej 8,000 këmbësh – ndihmë, ndihmë – po humbasim lartësi me një shpejtësi prej 10,000 këmbësh në minutë”, dëgjohet të thotë ai në regjistrime, ndërsa situata përshkallëzohej: “Kemi tejkaluar limitin e lejuar të shpejtësisë dhe po humbasim lartësi me një shpejtësi prej 20,000 këmbësh në minutë!” Në thirrjet e fundit dëshpëruese, ai shtoi: “Do të përplasemi përtokë! Po zbresim në 22,000 metra lartësi, jemi në një shpat prej 60 gradësh.” Pas britmave të tmerrit, fjalët e tij të fundit ishin: “Shikoni, do të rrëzohemi! Po na mbaron koha!” Të dhënat nga platforma e gjurmimit ADS-B Exchange tregojnë se fluturimi humbi 8,230 metra lartësi brenda vetëm një minute, pak para se sistemi të ndërpriste regjistrimin. Sekretari i Transportit i SHBA-së, Sean Duffy, reagoi përmes një postimi në rrjetet sociale, duke e cilësuar ngjarjen si një “tragjedi të tmerrshme”, ndërkohë që ende mbetet e paqartë nëse ka persona të lënduar në tokë. Sipas Administratës Federale të Aviacionit të SHBA-së (FAA), fluturimi ishte nisur nga Aeroporti Ndërkombëtar Austin-Bergstrom në Teksas me destinacion Aeroportin Eleuthera Veriore në Bahamas, por u rrëzua pranë zonës Cresthaven në Florida rreth orës 12:50 të pasdites, sipas kohës lokale. Ndërkohë, autoritetet kompetente, përfshirë FAA-në dhe Bordin Kombëtar të Sigurisë së Transportit të SHBA-së (NTSB), kanë nisur një hetim të detajuar për të zbardhur shkaqet e sakta të katastrofës. Zyra e Sherifit të Qarkut Palm Beach konfirmoi se hetimet janë duke vazhduar në zonën e Ushtarakëve, ndërsa të gjitha korsitë e qarkullimit rrugor në të dyja drejtimet janë mbyllur për siguri deri në një njoftim të dytë.