Krime lufte në Zubin Potok: Prokuroria kërkon paraburgim për nëntë persona të dyshuar

Gjykata Themelore në Prishtinë, respektivisht Departamenti Special, ka pranuar nga Prokuroria Speciale e Republikës së Kosovës një kërkesë zyrtare për caktimin e masës së sigurisë, paraburgimit, ndaj nëntë individëve që dyshohen për kryerjen e veprës penale “Krime lufte kundër popullsisë civile”. Në bazë të dokumentit të dorëzuar nga organi i akuzës, personat e identifikuar me inicialet D.D., M.R., M.R., R.R., S.D., S.D., V.L., R.R dhe D.D. po hetohen nën dyshimin e bazuar se janë përfshirë në vrasjen dhe zhdukjen e dhunshme të 23 civilëve në territorin e Zubin Potokut. Kjo kërkesë për paraburgim vjen si rezultat i fakteve, dëshmive dhe materialeve hetimore të siguruara deri në këtë fazë të procedurës penale. Nga Prokuroria Speciale bëjnë me dije se hetimet do të vijojnë intensivisht në përputhje me mandatin e tyre ligjor, duke garantuar njëkohësisht mbrojtjen e të drejtave të palëve dhe ruajtjen e konfidencialitetit për të dhënat që nuk lejohet të publikohen aktualisht.