Bilanci tragjik i Moskës: Tetori shënon numrin më të lartë të viktimave ruse që nga nisja e luftës

Presidenti i Ukrainës, Volodymyr Zelensky, ka bërë të ditur se forcat e armatosura të Rusisë kanë regjistruar një faturë të rëndë njerëzore prej 54,400 viktimash gjatë muajit të kaluar, duke përfshirë këtu si ushtarë të vrarë ashtu edhe të plagosur rëndë. Sipas kreut të shtetit ukrainas, ky bilanc përfaqëson humbjen më të madhe mujore të regjistruar për ushtrinë ruse që nga dita e parë e agresionit ushtarak në shkurt të vitit 2022. Përmes një postimi në rrjetin social X, Zelensky theksoi se data 21 tetor ka shënuar pikun më të përgjakshëm për trupat moskovite, me 2,250 ushtarë të nxjerrë jashtë luftës brenda një harku kohor prej 24 orësh. Ndërkohë, kreu i Kievit hodhi dritë edhe mbi situatën në terren, duke raportuar se gjatë muajit tetor ushtria ukrainase ka rimarrë nën kontroll 96.2 kilometra katrorë territor, duke tejkaluar me 10.4 kilometra katrorë sipërfaqen e pushtuar nga forcat ruse në të njëjtën periudhë. Në mbyllje të prononcimit të tij, lideri ukrainas i ka bërë thirrje udhëheqjes në Moskë që të heqë dorë nga dhuna dhe t'i drejohet rrugës së dialogut. “Për t’i dhënë fund këtyre humbjeve të pakuptimta, Rusia duhet vetëm të zgjedhë armëpushimin dhe diplomacinë”, deklaroi Zelensky.