Formë e shkëlqyer për Elbasanin e drejtuar nga Gledi Daja, përmbysje spektakolare edhe ndaj Laçit

Nën drejtimin e trajnerit Gledi Daja, AF Elbasani po kalon një moment fantastik, duke regjistruar shtatë pikë në tri ndeshjet e fundit dhe dy fitore radhazi me përmbysje. Në takimin e zhvilluar sot në stadiumin “Elbasan Arena”, skuadra verdheblu ka triumfuar me rezultatin 2:1 përballë Laçit, duke konfirmuar formën e lartë që po kalon në këtë periudhë të kampionatit. Miqtë nga Kurbini patën një nisje më të mirë të sfidës, duke kaluar të parët në epërsi në minutën e 8-të falë një goli të realizuar nga Traore. Megjithatë, reagimi i vendasve ishte i menjëhershëm dhe, vetëm katër minuta më vonë, në minutën e 12-të, Mazari barazoi shifrat duke rikthyer ekuilibrin në fushë. Goditja vendimtare dhe përmbysja e plotë u konkretizua në fraksionin e dytë të lojës. Ishte sërish protagonist Mazari, i cili në minutën e 67-të dërgoi topin përsëri në rrjetë, duke siguruar tri pikët e radhës për skuadrën e tij. Falë këtij suksesi të rëndësishëm, Elbasani ngjitet në kuotën e 14 pikëve dhe pozicionohet në vendin e katërt të klasifikimit, duke iu afruar ndjeshëm Dinamos së Ilir Dajës.