Britani: Mbi 4 mijë të arrestuar që nga shpallja e “Palestine Action” si organizatë e ndaluar

Bilanci i ndalimeve në Mbretërinë e Bashkuar lidhur me aktivitetin e grupit “Palestine Action” ka kapërcyer shifrën e katër mijë personave, që prej kohës kur kjo organizatë u nxjas jashtë ligjit në korrik të vitit 2025. Vetëm gjatë tubimit të fundit të organizuar të shtunën në afërsi të ambasadës amerikane në Londër, autoritetet policore vunë në pranga 325 individë. Nga ky numër, 320 prej tyre u ndaluan pasi dyshohet se kanë shprehur hapur mbështetje për një entitet të ndaluar, në përputhje me dispozitat e ligjit kundër terrorizmit. Një numër i madh protestuesish u grumbulluan në lagjen Nine Elms, duke mbartur transparente me parulla ku shkruhej: “Kundërshtoj gjenocidin, mbështes Palestine Action”. Gjatë kësaj proteste, e cila u shoqërua me thirrje në mbrojtje të çështjes palestineze, ndërhyrjet dhe shoqërimet e policisë vazhduan deri vonë në mbrëmje. Referuar shifrave zyrtare të Ministrisë së Brendshme britanike, 3 630 arrestime u regjistruan vetëm përgjatë harkut kohor prej një viti deri në qershor të 2026. Nëse kësaj shifre i shtohen 134 arrestimet e ndodhura më herët gjatë këtij viti pranë Gjykatës së Magjistraturës në Westminster, si dhe 325 të ndaluarit e së shtunës, shifra totale ngjitet në 4 089 raste. Mes personave të ndaluar nga uniformat blu ishte edhe 75-vjeçari Charles Allison, një avokat në pension që kishte udhëtuar nga Cumbria posaçërisht për këtë ngjarje. Ai shprehu shqetësimin e tij të thellë për tkurrjen e lirive civile, duke shtuar se ka shpresa që Gjykata e Lartë ta rrëzojë këtë ndalim si të paligjshëm. Një qëndrim të ngjashëm mbajti edhe një tjetër protestues, David Bolden, i cili e cilësoi vendimin e autoriteteve për ndalimin e grupit si një masë absurde ligjore. Nga ana e saj, lëvizja “Defend Our Juries”, e cila po koordinon fushatën e protestave kundër këtij vendimi, i ka etiketuar arrestimet si arbitrare dhe si një cenim të drejtpërdrejtë të lirisë së shprehjes. Kritikave iu bashkua edhe dega britanike e organizatës “Amnesty International”, e cila i ka bërë thirrje ekzekutivit britanik që të anulojë menjëherë ndalimin e vendosur ndaj “Palestine Action”. Në muajt në vijim, Gjykata e Lartë e Mbretërisë së Bashkuar pritet të marrë në shqyrtim bazueshmërinë ligjore të këtij ndalimi, pasi bashkëthemeluesit të grupit iu dha drita jeshile për të ushtruar të drejtën e apelimit. Ndërkohë, zyrtarët e Ministrisë së Brendshme kanë theksuar se do të mbrojnë me këmbëngulje ligjshmërinë e këtij vendimi gjatë procesit gjyqësor.