Kërcënimi terrorist në Moskë: FSB arreston një të mitur pas alarmit të lëshuar nga Ambasada e SHBA-së

Autoritetet ruse kanë vënë në pranga një të mitur, pasi ky i fundit dyshohet se ishte i përfshirë në një komplot terrorist që kishte në shënjestër Rezervën e Muzeut Tsaritsyno në kryeqytetin rus. Ngjarja ka pasur një kthesë të shpejtë pas një alarmi të dhënë nga misionet e huaja diplomatike. Të shtunën, Ambasada e Shteteve të Bashkuara në Moskë bëri publike një paralajmërim sigurie, duke vënë në dukje një “kërcënim të besueshëm për një ngjarje me viktima masive” pikërisht në atë lokacion. Përfaqësuesit e Uashingtonit theksuan se po punonin ngushtë me zyrtarët rusë për të bashkërenduar hapat e nevojshëm. Edhe pse detajet ishin të pakta, amerikanët u bënë thirrje qytetarëve të tyre që të qëndrojnë larg zonës dhe të shmangin grumbullimet e mëdha. Sipas njoftimit zyrtar të Shërbimit Federal të Sigurisë (FSB), i cili u bë publik të dielën përmes mediave shtetërore, operacioni i shpejtë çoi në kapjen e një të mituri me shtetësi ruse. Sipas autoriteteve, i dyshuari kishte publikuar në rrjetin social TikTok imazhe të veten me pajisje taktike, maskë, syze dielli dhe një objekt që ngjante me armë automatike, shoqëruar me fotografi nga muzeu dhe diçiturën: “Gjeta një vend”. Si masë paraprake, kompleksi i muzeut dhe parkut Tsaritsyno u mbyll menjëherë mbrëmjen e të shtunës për motive teknike, duke detyruar evakuimin e menjëhershëm të qytetarëve, ndërsa dyert u rihapën për publikun më 1 nëntor. Një paralajmërim i ngjashëm sigurie për këtë hapësirë muzeale ishte lëshuar paraprakisht edhe nga Ambasada e Gjermanisë. Kujtojmë se një skenar i ngjashëm ndodhi në muajin mars të këtij viti, kur Ambasada e SHBA-së paralajmëroi për sulme të mundshme pak ditë para tragjedisë në sallën e koncerteve “Crocus City Hall”, ku humbën jetën mbi 150 persona dhe qindra të tjerë mbetën të plagosur. Në atë periudhë, kreu i Kremlin, Vladimir Putin, i pati quajtur alarmet perëndimore si “provokuese” dhe “shantazh i hapur” që synonte destabilizimin e brendshëm të shoqërisë ruse.