Barazim në Korçë, Skënderbeu dhe Vllaznia ndajnë nga një pikë në sfidën e Superiores

Skënderbeu dhe Vllaznia nuk kanë arritur të fitojnë përballjen e tyre direkte, duke mbyllur me barazimin 1-1 ndeshjen e vlefshme për javën e 10-të të Abissnet Superiore, e cila u zhvillua në stadiumin e qytetit të Korçës. Gjatë 45 minutave të para, skuadra vendase tregoi një lojë më sulmuese dhe mori kontrollin e fushës. Ky dominim u kurorëzua në minutën e 31-të, kur sulmuesi Bismark përfitoj nga një krosim i saktë i Shkëmbit dhe shënoi me kokë për t'i dhënë avantazhin korçarëve. Në fraksionin e dytë të lojës, skuadra shkodrane ngriti ritmin dhe kërkoi me ngulm golin e barazimit. Përpjekjet e kuqebluve u shpërblyen në minutën e 67-të, ku Bekim Balaj u tregua i saktë në zonë, duke realizuar me kokë pas një asisti të dhënë nga Murataj. Minutat e mbetura sollën tension në fushë, sidomos kur stafi dhe lojtarët e Vllaznisë pretenduan për dy penallti, por gjyqtari kryesor dhe dhoma e sistemit VAR vendosën të vazhdonin lojën. Një rol kyç në këtë përballje patën edhe portierët, Dobjani i korçarëve dhe Jukaj i shkodranëve, të cilët neutralizuan disa raste rreziku me pritjet e tyre decizive, duke bërë që rezultati të mbetej i pandryshuar deri në fund. Pas këtij rezultati, Skënderbeu pozicionohet në vendin e shtatë të klasifikimit me 11 pikë në total. Ndërkohë, Vllaznia vazhdon të përballet me një ecuri negative rezultatesh, duke mbetur e izoluar në vendin e nëntë me vetëm 9 pikë të grumbulluara deri më tani.