Tragjedi në Itali: Ndërron jetë në moshën 22-vjeçare ish-futbollisti Giacomo Ghiardelli

Komuniteti i futbollit në Itali është përfshirë nga gyelli dhe pikëllimi pas konfirmimit të vdekjes së parakohshme të Giacomo Ghiardellit. Ish-lojtari i skuadrave të njohura Alessandria dhe Asti ka ndërruar jetë në moshën 22-vjeçare, pasi nuk ka mundur të fitojë betejën e gjatë dhe të mundimshme me një sëmundje të rëndë. Gjatë karrierës së tij të rinisë, Ghiardelli ishte aktivizuar me grupmoshat e reja të Alessandrias deri në përfundim të sezonit 2023/24, periudhë kjo kur vendosi të bëjë kalimin te skuadra e Asti, e cila militon në kampionatin e Serie D. Vetëm 24 orë përpara se të jepej lajmi i hidhur, dy klubet e tij të zemrës, Alessandria dhe Asti, kishin shfrytëzuar përballjen e tyre direkte në fushën e blertë për t'i dërguar një mesazh solidarizimi dhe mbështetjeje të fuqishme të riut, i cili po kalonte çaste kritike për shkak të gjendjes shëndetësore. Megjithatë, pak orë pas këtij gjesti solidarizimi, ambientet sportive të të dyja skuadrave dhe mbarë opinionik publik u tronditën nga njoftimi tragjik për ndarjen e tij përfundimtare nga jeta. Humbja e parakohshme e Giacomo Ghiardellit ka lënë një boshllëk të madh dhe ka përlotur sportdashësit italianë, ndërsa homazhet dhe ngushëllimet më të sinqerta janë shprehur nga të gjitha klubet ku ai la gjurmë gjatë rrugëtimit të tij të shkurtër futbollistik.