Konflikti në radhë për vaj ulliri në Kroaci: 67-vjeçari qëllon me sëpatë bashkëkombësin

Një ngjarje e rëndë ka tronditur qytezën Vodnjan në Istri të Kroacisë, ku një 67-vjeçar është vënë në pranga nga organet e rendit, pasi dyshohet se ka sulmuar me sëpatë në kokë një 46-vjeçar gjatë një mosmarrëveshjeje. Sipas informacioneve zyrtare të bëra publike nga policia e Pulës, incidenti ka degjeneruar paraditen e sotme ndërsa dy burrat po prisnin në radhë jashtë një punishteje për përpunimin e vajit të ullirit. Pas një debati të çastit mes tyre, situata ka dalë jashtë kontrollit dhe i moshuari ka përdorur një sëpatë, duke e goditur bashkëkombësin e tij në zonën e kokës. I lënduari është dërguar menjëherë në spitalin e Pulës për t'i dhënë ndihmën e nevojshme mjekësore, ku pas ekzaminimeve mjekët kanë konfirmuar se ai ka pësuar vetëm lëndime të lehta trupore. Ndërkohë, Administrata Policore e Istrisë ka bërë të ditur se ndaj 67-vjeçarit do të ngrihet kallëzim penal, pasi ai dyshohet për veprën penale të tentativës për shkaktim të lëndimeve të rënda trupore.