Kriza financiare detyron Barcelonën: Alejandro Balde në listën e largimeve për merkaton e dimrit

Klubi i Barcelonës ka nisur përgatitjet për afatin kalimtar të janarit, ku trajneri Hansi Flick dhe drejtori sportiv Deco synojnë që të sjellin në ekip një qendërmbrojtës me cilësi të larta. Megjithatë, situata e brishtë ekonomike e klubit katalunas e bën të detyrueshme një shitje paraprake, pasi rregullat financiare nuk lejojnë ndërhyrje pa pasur më parë të ardhura nga largimet. Drejtuesit nuk janë të interesuar për lojtarë mesatarë, por kërkojnë vetëm profilin e duhur që do t'i jepte siguri shtesë prapavijës. “Ne gjithmonë kërkojmë më të mirën për ekipin. Dhe po e bëjmë këtë. Do të shohim, kanë mbetur ende disa javë deri në hapjen e afatit kalimtar të dimrit. Nëse mund të bëjmë diçka, ndoshta do ta bëjmë”, deklaroi Flick të premten në konferencën për shtyp para ndeshjes ndaj Alavesit. Dëmtimet e shpeshta në repartin defensiv gjatë javëve të fundit e kanë shtyrë strategun gjerman të kërkojë përforcime të reja, por vetëm nëse ato plotësojnë standardet e kërkuara sportive. Sipas të dhënave nga terreni, emri i Alejandro Baldes mbetet ai me shanset më të larta për t'i dhënë thetë lamtumirë klubit, duke qenë se pozita e tij është lëkundur ndjeshëm muajt e fundit. Edhe pse skuadra kishte mungesa të theksuara në mbrojtje, Flick vendosi të mos e nisë ndeshjen ndaj Alavesit me Balden në formacionin bazë, duke i dhënë mundësinë e debutimit në La Liga talentit Brian Fariñas. Më parë, tekniku ka eksperimentuar edhe me opsione të tjera si Eric García apo i riu Xavi Espart, dëshmi kjo se anëtari i Kombëtares spanjolle nuk përbën më zgjedhjen e parë të trajnerit. Mbrojtësi kishte vendosur të qëndronte gjatë verës me shpresën se do të rifitonte hapësirat dhe besimin e stafit teknik, por rrethanat janë bërë gjithnjë e më sfiduese për të. Situata pritet të komplikohet edhe më shumë me rikthimin e afërt të Jules Koundés, ndërsa prania e vazhdueshme e Joao Cancelos në krahun e majtë e kufizon ndjeshëm hapësirën e veprimit për Balden. Ndonëse Flick nuk e ka fshirë plotësisht nga planet e tij dhe pritet t'i japë minuta për shkak të emergjencave, kthimi i tij në nivelet e para disa sezoneve duket tejet i komplikuar. Për këtë arsye, drejtuesit e shohin atë si lojtarin ideal për t'u shitur, pasi interesi në treg ekziston dhe të ardhurat nga ky transferim do t'i hapnin rrugë financiare afrimit të një qendërmbrojtësi të ri. Kjo nevojë konfirmohet edhe nga zëvendëspresidenti ekonomik i klubit, Ferran Olivé, i cili ka theksuar se Barcelona detyrohet të shesë për të blerë, duke pasur parasysh se margjina e mbetur në kuadër të rregullit financiar 1:1 llogaritet në vetëm 3 deri në 4 milionë euro.