Egnatia mposht Tiranën, Dede: E kemi mendjen te sfida evropiane me Craiovën

Kampionët në fuqi të Egnatias kanë siguruar një fitore të rëndësishme në transfertë kundër Tiranës me rezultatin 1-2, sfidë kjo e vlefshme për javën e 10-të të “Abissnet Superiore”. Pas përfundimit të këtij takimi, trajneri i rrogozhinasve, Nevil Dede, ka analizuar paraqitjen e skuadrës së tij përpara mediave, duke u ndalur te kreu i renditjes, problemet fizike të lojtarëve dhe ngarkesa e madhe e ndeshjeve. “Vendi i parë, besoj se kjo ju kënaq të gjithëve. Sa i përket dëmtimeve, shpresojmë që situata e Bitrit të mos jetë shqetësuese. Më vjen keq edhe për Grudën në një moment që mund të kishte nxjerrë më shumë përfitim”, u shpreh fillimisht tekniku. Më tej, ai theksoi se kalendari i ngjeshur po ndikon te skuadra, e cila po lënë shumë energji në fushë: “Në futboll këto probleme janë të pranishme dhe, ndryshe nga të tjerët, ne po luajmë çdo tri ditë. Megjithatë, po ruajmë të njëjtin standard dhe strukturë loje”. Duke analizuar kthesën në fraksionin e dytë të lojës, Dede sqaroi se skuadra e tij arriti të lexojë saktë dobësitë e kundërshtarit: “Në pjesën e dytë djemtë kuptuan se ku qëndronte diferenca. Ne evidentuam pikat e dobëta të Tiranës dhe e zgjidhëm ndeshjen. Edhe pse bëmë një rotacion të madh, sërish nuk arritëm t'i ruajmë të gjithë lojtarët nga dëmtimet. Është bërë e pashmangshme që të ketë shqetësime fizike”. Në fund të deklaratës së tij, trajneri i Egnatias ia dedikoi këtë triumf tre futbollistëve, ndërsa foli edhe për sfidën e radhës në arenën ndërkombëtare: “Këtë fitore ua dedikoj Sotës, Grudës dhe Bitrit. Për sa i përket Montenegros, ai po mundohet shumë, por ende nuk po arrin të përshtatet plotësisht dhe mbase është edhe pak faji im që nuk i kam dhënë minutat e duhura. Shpresojmë të zhbllokohet sa më parë”. “A e ka ekipi ende stofin e kampionit dhe a e kanë mendjen te Evropa? Është njerëzore të jetë kështu, pasi ngarkesa është tejet e madhe. Po përpiqemi t'i shpërndajmë forcat dhe përgjegjësitë. Të gjithë duan të japin më të mirën kundër nesh, por kjo është një luftë sportive dhe një maratonë e gjatë. Tani duhet të rikuperojmë kohën dhe energjitë për ndeshjen e rëndësishme kundër Craiovës”, përfundoi Dede.