Tragjedia e Arlinda Zekajt: Vjosa Osmani akuzon drejtësinë për neglizhencë totale dhe mungesë masash

Ish-presidentja e vendit, Vjosa Osmani, ka reaguar ashpër pas bërjes publike të një letre prekëse që Arlinda Zekaj ia kishte dërguar gjykatësit, ku i lutej me urgjencë për caktimin e një urdhri mbrojtës. Duke ndarë një pjesë të këtij mesazhi thirrje për ndihmë, Osmani theksoi se institucionet e drejtësisë kanë dështuar plotësisht në misionin e tyre për të garantuar sigurinë e saj. Ajo ka veçuar një prej fjalive më domethënëse të letrës: “Për ju është rutinë, për mua është jetë”. “Kjo fjali, e shkruar nga Arlinda Zekaj në kërkim të ndihmës, përbën një aktakuzë të rëndë ndaj një sistemi që kishte për detyrë ta mbronte, por që dështoi të reagonte në kohën e duhur”, ka shkruar Osmani. Më tej, ajo ka theksuar se asnjë grua dhe nënë nuk duhet të vihet në pozitën që të përgjërohet për të drejtën elementare të jetës. “Nuk duhet të ketë nevojë të lutet që fëmijët e saj të jenë të sigurt. Dhe mbi të gjitha, nuk duhet të ketë frikë se institucionet do të reagojnë vetëm kur të jetë tepër vonë. Tepër vonë është treguar edhe sistemi gjyqësor, i cili deri më tani ka ndërmarrë ZERO masa ndaj gjyqtarëve që shfaqën papërgjegjshmëri dhe neglizhencë”, ka përfunduar Osmani.