Tragjedi në Gjilan: Arrestohet 65-vjeçari, dyshohet se vrau djalin e tij 27-vjeçar dhe një foshnjë

Një ngjarje e rëndë ka tronditur fshatin Demiraj të Gjilanit, ku një 65-vjeçar ka rënë në pranga pasi dyshohet se është përfshirë në një krim të dyfishtë, ku mbetën të vdekur një 27-vjeçar dhe një foshnjë. Sipas njoftimit zyrtar nga Policia e Kosovës, alarmi është dhënë më 1 nëntor, rreth orës 08:47, pasi në një banesë brenda këtij fshati janë lokalizuar dy trupa pa shenja jete. Të gjitha njësitet relevante policore, së bashku me Prokurorin e Shtetit dhe ekipet e mjekësisë urgjente, kanë mbërritur menjëherë në vendngjarje, ku mjekët kanë konfirmuar zyrtarisht vdekjen e dy viktimave. Në bazë të hetimeve paraprake, ngjarja dyshohet se ka ndodhur në rrethana familjare. Si i dyshuar kryesor është prangosur babai i viktimës së re, i cili, me urdhër të prokurorit kompetent, është dërguar në mbajtje për 48 orë. Ndërkohë, ky rast është referuar në organet e drejtësisë si “Vrasje e rëndë”, kurse trupat e pajetë janë transportuar drejt Institutit të Mjekësisë Ligjore në Prishtinë për t'i nënshtruar ekzaminimit obduktues.