PDK kërkon veprime konkrete pas miratimit të deklaratës për UÇK-së: Hapi i radhës është votimi i ndryshimeve ligjore

Partia Demokratike e Kosovës ka shprehur mirënjohjen e saj ndaj deputetëve për miratimin në Kuvend të deklaratës që reagon ndaj aktgjykimit të Dhomave të Specializuara në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit. Përmes një reagimi, kjo forcë politike ka falënderuar të gjitha subjektet parlamentare për bashkëpunimin dhe mbështetjen e dhënë në përafrimin e përmbajtjes së këtij dokumenti, i cili u inicua pikërisht nga grupi i saj parlamentar. Sipas kësaj partie, Kuvendi dëshmoi sot gatishmërinë e tij për të mbrojtur të vërtetën historike të luftës çlirimtare, duke kundërshtuar një vendim që cilësohet si i padrejtë. Ky bashkërendim politik, theksohet në njoftim, duhet domosdo të shndërrohet në veprime konkrete. Në këtë kuadër, radhën e ka Projektligji për ndryshimin dhe plotësimin e Ligjit për Dhomat e Specializuara, nismë kjo e propozuar nga PDK-ja. Ajo i bën thirrje Ekzekutivit që ta procedojë pa humbur kohë në Kuvend, ndërsa u kërkon të gjitha grupeve politike që ta trajtojnë dhe miratojnë me procedurë të përshpejtuar. Ndërkohë që deklarata reflekton qëndrimin politik të Kuvendit, votimi i ligjit mbetet hapi vendimtar për t'i dhënë përgjigje institucionale sfidave të ngritura. PDK-ja zotohet se do të vijojë angazhimin e palëkundur për mbrojtjen e pastërtisë së luftës së Ushtrisë Çlirimtare të Kosovës dhe për sigurimin e një procesi të drejtë për ish-udhëheqësit e saj. Në përmbyllje, u theksua se dëshmia e sotme e konsensusit kombëtar për mbrojtjen e vlerave tona më sublime duhet të përsëritet pa mungesë edhe gjatë procesit të votimit të ligjit në fjalë.