Trajneri shqiptar bën mrekullinë në Azerbajxhan, Beqiri ndal gjigantin Qarabag

Jeton Beqiri dhe skuadra e tij, Gabala, kanë siguruar një barazim me peshë të madhe përballë Qarabagut, një prej ekipeve më dominuese në futbollin e Azerbajxhanit, duke e mbyllur sfidën e luajtur në terrenin e tyre pa gola, 0:0. Strategu shqiptar ka arritur të neutralizojë skuadrën favorite në kuadër të javës së 10-të të kampionatit elitar të Azerbajxhanit, falë një paraqitjeje të studiuar mirë në aspektin taktik. Gjatë gjithë takimit, Gabala u shfaq tejet e organizuar dhe e disiplinuar në mbrojtje, duke mos i lejuar kundërshtarët të zhvillojnë lojën e tyre të zakonshme. Edhe pse mysafirët patën kontroll më të madh të topit, ata dështuan që zotërimin e fushës ta përkthenin në epërsi rezultati. Për teknikun Beqiri, ky sukses përbën një kthesë të rëndësishme, pasi Gabala ka arritur të regjistrojë dy takime radhazi pa pësuar humbje, duke nisur kështu ngjitjen graduale për t'u larguar nga zonat e rrezikshme të renditjes.