Portret i një idealisti: Rrugëtimi i guximshëm i Isak Shabanit ndër furtunat e lirisë

Nata e ushqeu me gjak rinor, ndërsa dita e rriti si një sokol malësor. Nga Orllani e deri në Prishtinë, nëpër shi e dëborë, ai i kaloi fushat dhe malet këmbë. Edhe pse përballej me acar e stuhi, ai numëronte me dhimbje çdo varr të djemve të rinj, të vrarë nga policët dhe ushtarët e armikut. Ai betohej në Flamurin e Arbërit dhe në fjalën e burrave të Kongresit të Manastirit se do të ishte krahu i djathtë i Zahir Pajazitit. Më 4 shtator 1994, te diga e Liqenit të Batllavës, ata goditën si rrufe mbi policët, xhelatët dhe satrapët e armikut, të cilët terrorizonin Llapin dhe Gallapin. Isak Shabani, me guxim luani dhe zemrën kala, nuk u ndal asnjëherë, derisa u zu në befasi nga xhandarët e armikut. Në burgun famëkeq të Sremit, ai u torturua barbarisht dhe u la në gjak. Megjithatë, i kishte vënë vetes një kusht të panegociueshëm: të vdiste e të mos jetonte kurrë me njollën e tradhtarit apo të njeriut të shitur te armiku. Edhe pse i lidhur këmbë e duar, si një Promete në pranga, ai arriti të mbijetonte gjatë Masakrës së Dubravës. Në çdo bisedë me familjarë, shokë e miq, ai shprehet se Zoti e bekoi dhe e shpëtoi që të mund t'u tregonte të tjerëve për netët e ferrit të përjetuara nga regjimi serb, i cili entuziazmohej kur shihte lumenjtë e përzier me gjakun shqiptar. I rritur me ajrin e pastër të maleve të Gallapit, Isak Shabani qysh në rininë e hershme mbante mend pranverën e përgjakshme të vitit 1981. Ai e dinte mirë se qëllimi i armikut ishte të vriste e të shkatërronte, e më pas t'i dëbonte shqiptarët nga vatrat e tyre, njëlloj si dikur nga Sanxhaku i Nishit. Krah për krah me djemtë trima të Gallapit dhe Llapit, ai dha betimin se për së gjalli nuk do ta pranonte robërinë. Ata krijuan njësi të vogla prej tre e katër vetash, të cilat me kalimin e kohës u shndërruan në Ushtrinë e lavdishme Çlirimtare të Kosovës. Ditën që morën armët në duar, të gjithë u betuan se do të qëndronin në rezistencë deri në vdekje, duke ndjekur shembullin e rënies në Bregun e Diellit në Prishtinë të heronjve Afrim Zhitia dhe Fahri Fazliu.