Halloween në protestë: Studentët ironizojnë me maska, policia shoqëron pesë persona

Dita e 19-të e tubimit të studentëve u përputh me festën e Halloween-it, duke krijuar një atmosferë të pazakontë dhe me dy qasje të ndryshme ndaj maskimit përgjatë rrugëve të kryeqytetit. Në bulevardin “Dëshmorët e Kombit”, disa vajza të reja u panë të veshura me uniforma që imitonin strukturën e policisë. Ato mbanin pankarta në duar dhe sqaruan me doza ironie arsyen e përzgjedhjes së këtij kostumi simbolik për këtë natë. Megjithatë, maskat ishin të pranishme edhe në aspektin e protestës. Përveç kapuçëve tradicionalë dhe fytyrave të mbuluara, disa pjesëmarrës zgodhën maska të personazheve horror, kurse të tjerë preferuan t'i përdornin ato për të përcjellë mesazhe me prapavijë politike. Fytyrat e mbuluara u vunë re gjithashtu te personat e njohur si pjesë e “grupit të zjarrit”, një shprehje që përdoret për elementët rinorë të përfshirë në incidente të dhunshme gjatë tubimeve. Nga ana e saj, Policia e Shtetit bëri të ditur se ka shoqëruar pesë qytetarë të maskuar, mes të cilëve edhe një të mitur. Ndërkohë, tre prej tyre, të cilësuar si shkelës të përsëritur, përballen me rrezikun e gjobave që shkojnë deri në 500 mijë lekë. Sipas ndryshimeve më të fundit në kuadrin ligjor për tubimet, fshehja e paligjshme e identitetit ndëshkohet me gjoba nga 10 mijë deri në 100 mijë lekë. Kur kësaj i shtohet mosbindja ndaj urdhrit të forcave të rendit për shpërndarje ndërkohë që identiteti është i maskuar, gjoba mund të arrijë vlerën e 500 mijë lekëve.