Tragjedi në Has: Përmbyset automjeti sportiv, ndërron jetë 46-vjeçari nga Kosova dhe plagoset vëllai i tij

Një ngjarje e rëndë ka tronditur zonën e Hasit, ku një shtetas nga Kosova ka gjetur vdekjen dhe një tjetër ka mbetur i plagosur si pasojë e një aksidenti me mjete sportive. Ngjarja tragjike është shënuar në zonën kullotore të fshatit Domaj, pjesë e njësisë administrative Gjinaj. Drejtuesi i mjetit sportiv, 46-vjeçari me iniciale A. Q., ka humbur jetën pasi automjeti me të cilin po lëvizte është rrokullisur. Në mjet ndodhej edhe vëllai i tij, 38-vjeçari me iniciale V. Q., i cili ka pësuar lëndime dhe është dërguar urgjentisht në spitalin rajonal të Kukësit, ku po i nënshtrohet trajtimit të nevojshëm mjekësor. Burimet paraprake pranë strukturave policore bëjnë me dije se pista kryesore e ngjarjes mbetet përmbysja aksidentale e mjetit sportiv gjatë lëvizjes në terrenin e fshatit Domaj. Forcat e rendit dhe grupi i posaçëm hetimor kanë mbërritur menjëherë në vendin e ngjarjes dhe po kryejnë të gjitha veprimet e duhura proceduriale, me qëllim dokumentimin e plotë të shkaqeve dhe rrethanave që sollën këtë fatalitet.