Situatë urgjente në fluturimin Gjenevë–Prishtinë: Ndërhyrja e shpejtë e mjekes shpëton udhëtaren

Një situatë e papritur ka ndodhur gjatë një fluturimi të kompanisë ajrore “EasyJet” në relacionin Gjenevë–Prishtinë, ku një pasagjere ka pësuar probleme shëndetësore në bord. Sipas të dhënave në dispozicion, sapo gruaja ka shfaqur shenja të përkeqësimit të gjendjes, një nga udhëtaret e tjera, e cila ushtron profesionin e mjekes, i ka dalë menjëherë në ndihmë, duke i qëndruar pranë dhe duke u kujdesur për të përgjatë gjithë udhëtimit. Menjëherë pas uljes së avionit në Aeroportin Ndërkombëtar të Prishtinës, ekipet mjekësore emergjente janë futur brenda kabinës për t'i dhënë ndihmën e parë pasagjeres së prekur. Ky moment është kapur dhe dokumentuar edhe përmes fotografive të shkrepura në vendngjarje. Ndërkohë, autoritetet ende nuk kanë dhënë detaje zyrtare lidhur me shkaqet e shqetësimeve apo gjendjen aktuale shëndetësore të udhëtares.