Mercenarët serbë nga Mali i Zi që luftojnë në Ukrainë lëshojnë kërcënime ndaj Kurtit dhe lavdërojnë ngjarjet e Banjskës

Dy shtetas malazezë të përkatësisë etnike serbe, të cilët raportohet se janë radhitur përkrah forcave ruse në luftën në Ukrainë, kanë dalë me një video-mesazh provokues, ku nuk mungojnë fyerjet nacionaliste dhe referencat e drejtpërdrejta ndaj kryeministrit të Kosovës, Albin Kurti. Gjatë xhirimit të publikuar në rrjet, protagonistët shprehin hapur mbështetjen e tyre për presidentin serb Aleksandar Vuçiq, ndërkohë që lëshojnë akuza të rënda ndaj rivalëve të tij politikë, duke i etiketuar ata si bashkëpunëtorë të kundërshtarëve të Serbisë. Në vijim të mesazhit, ata kalojnë në tone kërcënuese ndaj shefit të ekzekutivit kosovar, Albin Kurti, duke paralajmëruar një kthim të mundshëm në territorin e Kosovës. Në hyrje të videos, dy personat vetëprezantohen si serbë nga Mali i Zi dhe adresojnë përshëndetje specifike për komunitetin serb në Kosovë, duke vënë theksin te ngjarjet në fshatin Banjskë. “Jemi dy vëllezër nga Mali i Zi, dy serbë. Duhet t’i përshëndesim vëllezërit tanë nga Kosova dhe Metohia, popullin serb nga Banjska. Përshëndetje të mëdha për vëllezërit”, thonë ndër të tjera ata në video.