Prishtina 2030 në fokus: Kosova kërkon ekspertizën franceze për infrastrukturën dhe transportin e Lojërave Mesdhetare

Autoritetet e Kosovës dhe ato franceze kanë hedhur hapa konkretë drejt zgjerimit të bashkëpunimit dypalësh, me fokus të veçantë te përgatitjet intensive për organizimin e Lojërave Mesdhetare "Prishtina 2030", ku u trajtuan çështje kyçe që lidhen me infrastrukturën, rrjetin e transportit dhe zhvillimin e qëndrueshëm urban. Lajmi u bë i ditur nga Ambasadori i Kosovës në Francë, Lulzim Hiseni, i cili përmes një njoftimi tregoi se së bashku me ministrin e Sportit dhe Rinisë në Qeverinë e Kosovës, Blerim Gashani, kanë mbajtur një takim pune me Gérard Wolf, të dërguarin e posaçëm të Francës për qytetet e qëndrueshme dhe transportin. Në këtë takim të rëndësishëm mori pjesë gjithashtu edhe Barbara Petri-Uy, në cilësinë e këshilltares së ministrit. "Lojërat Mesdhetare Prishtina 2030: forcimi i bashkëpunimit Kosovë–Francë për një trashëgimi të qëndrueshme. Së bashku me Blerim Gashanin, ministër i Sportit dhe Rinisë i Kosovës, zhvilluam një takim me Gérard Wolf, të dërguarin e posaçëm të Francës për qytetet e qëndrueshme dhe transportin, në prani të Barbara Petri-Uy, këshilltare e ministrit. Diskutimet u përqendruan në përgatitjet për Lojërat Mesdhetare Prishtina 2030, veçanërisht në mundësitë për të shfrytëzuar ekspertizën franceze në fushën e infrastrukturës, mobilitetit dhe zhvillimit të qëndrueshëm urban", ka deklaruar diplomati kosovar. Ndër të tjera, Hiseni nënvizoi se ky takim shërbeu si një platformë e shkëlqyer për të përcaktuar fushat e bashkueshme të punës drejt një partneriteti edhe më të fortë mes dy shteteve, gjithnjë në shërbim të mbarëvajtjes së kësaj ngjarjeje të madhe sportive.