Mourinho tregon ambiciet e Realit: Kemi pjekuri për të fituar trofe, El Clasico ishte vetëm një ndeshje

Tekniku i Real Madridit, Jose Mourinho, ka vlerësuar lart pjekurinë e treguar nga grupi i tij, pasi lojtarët kanë ditur të kthejnë menjëherë vëmendjen te sfida e radhës ndaj Racing Santander, menjëherë pas triumfit në El Clasico, duke rikonfirmuar ambicien e madhe për të ngritur trofe në fund të sezonit. Strategu portugez ka vënë inë pah rritjen e vazhdueshme të karakterit të skuadrës, e cila sfidë pas sfide po dëshmon se synimi i saj primar mbetet triumfi në garat ku merr pjesë. "Që në nisje të këtij rrugëtimi, dinamika ka qenë e njëjtë. Euforia e triumfit apo zhgënjimi mund të ndryshojnë, por baza mbetet e pandryshuar, duke ruajtur një ekuilibër të shkëlqyer", u shpreh fillimisht Mourinho në konferencë për shtyp. Më tej, ai shtoi se pavarësisht se nuk bëhet fjalë për një organikë me eksperiencë të madhe, skuadra po shfaq një pjekuri të jashtëzakonshme kolektive. Sipas tij, qetësia dhe puna e palodhur janë kthyer në pikat e forta të grupit, ku gëzimi i fitores pasohet menjëherë nga qetësia dhe serioziteti për detyrat e radhës. Duke komentuar ecurinë e lojtarëve, trajneri ka theksuar se është tejet i kënaqur me nivelin e pjekurisë së shfaqur, ndërsa ka përsëritur se misioni kryesor i klubit mbetet fitimi i titujve dhe jo vetëm triumfi në një përballje të vetme ndaj Barcelonës. Në fund, portugezi ka folur edhe për sfidën e ardhshme, duke kërkuar përqendrim maksimal ndaj një kundërshtari që tregon forcë në fushën e vet dhe në një orar të pazakontë, duke e cilësuar këtë duel si një provë kyçe për të konfirmuar formën e mirë pas suksesit të javës së kaluar.