Kaka analizon transformimin e Milanit: Pa Leon, skuadra tani funksionon si një kolektiv i vërtetë

Ish-mesfushori legjendar i kuqezinjve, Ricardo Kaka, është i bindur se Milani ka kaluar në një fazë pozitive zhvillimi pas largimit të Rafael Leaos, duke e vlerësuar grupin aktual nën drejtimin e Rúben Amorim si një skuadër që mbështetet te bashkëpunimi i gjithanshëm dhe jo te një individ i vetëm. Në një rrëfim të dhënë për “La Gazzetta dello Sport” në prag të derbit të zjarrtë të Milanos, i cili do të luhet sonte në orën 20:45, braziliani analizoi dinamikat e reja të klubit, duke theksuar se periudha e mbështetjes së tepruar te një lojtar i vetëm ka marrë fund. “Ishte një proces në zhvillim e sipër. Për shtatë vjet ishte Milani i Leaos, një lojtar i madh tek i cili klubi mbështetej shumë. Tani është ndryshe. Ekipi është një kolektiv me fytyra të reja dhe dy mjeshtër: Modriq është ende truri i skuadrës, pastaj është Rabiot. Ndërsa Ramos është golashënues. Do të duhet pak kohë që të gjitha këto të bashkohen. E rëndësishme është që gjithmonë të synohet lart, edhe në Ligën e Evropës”, u shpreh Kaka. Kujtojmë se sulmuesi portugez u transferua te Galatasaray në muajin gusht për shifrën e 38 milionë eurove, duke mbyllur një cikël shtatëvjeçar në “San Siro”. Për të mbuluar këtë boshllëk, drejtuesit e Milanit ndërmorën investime të rëndësishme në merkato, ku spikat blerja rekord e Gonçalo Ramos për 73.1 milionë euro. Duke iu kthyer edicionit të kaluar, kur “Rossonerët” humbën biletën për në Ligën e Kampionëve në sekondat e fundit të kampionatit pas disfatës në shtëpi përballë Cagliarit, ikona braziliane ndau opinionin e tij kritik. “Besoj se të gjithë tifozët prisnin kualifikimin në Ligën e Kampionëve. Ishte rënie fizike apo mendore? Ndoshta pak nga të gjitha. Kur fillon të humbasësh vetëbesimin, gjithçka ndryshon. Tani synimi duhet të jetë rikthimi në garën më të rëndësishme evropiane. Liga e Kampionëve është diçka e veçantë”, shtoi ai. Për sfidën e sotme, Milani pozicionohet në vendin e pestë me 18 pikë të grumbulluara, shtatë më pak se rivalët e qytetit, Interi, pas pengesës që pësuan të mërkurën me rezultatin 4-2 në shtëpi kundër Bolognas. Kaka, i cili e ka nisur rrugën e tij të golave për Milan toc në një derbi historik të vitit 2003, veçoi elementët që mund të bëjnë diferencën në fushë. “Modric dhe Rabiot janë mjeshtër, ata mund ta kontrollojnë lojën dhe ta përcaktojnë ritmin e saj. Pulisic më mahnit me inteligjencën e tij, ndërsa Gonçalo është golashënues. Sa i përket Interit, çfarë mund të them? Është një ekip i qëndrueshëm, solid dhe ka shumë rreziqe”, përfundoi ai.