Formë e lartë e Dritës, gjilanasit triumfojnë ndaj Vushtrrisë dhe afrohen ndjeshëm kreut

Skuadra e Dritës ka arkivuar një tjetër fitore të rëndësishme në kampionat, pasi ka mposhtur Vushtrrinë me rezultatin 3:1, duke hedhur një hap para në renditjen tabelare. Formacioni nga Gjilani e ka dominuar pjesën e parë të takimit, duke gjetur golin e avantazhit në minutën e 19-të përmes Mike Arthur. Presioni i vazhdueshëm i gjilanasve solli edhe dyfishimin e epërsisë vetëm 12 minuta më vonë, kur në skenë doli Kemelho Nguena. Megjithatë, Vushtrria nuk u dorëzua dhe reagoi para se të mbyllej fraksioni i parë i lojës. Ishte minuta e 42-të, kur Albion Shurdhiqi realizoi një gol spektakolar, duke ngushtuar shifrat në 2:1 dhe duke rikthyer tensionin në fushë. Në pjesën e dytë, Drita menaxhoi mirë ritmin dhe e vulosi fatin e kësaj sfide në minutën e 79-të. Albert Dabiqaj shënoi golin e tretë për skuadrën e tij, duke siguruar përfundimisht tri pikët e plota. Pas këtij suksesi, Drita ngjitet në kuotën e 23 pikëve, duke u pozicionuar në vendin e tretë të tabelës, ndërkohë që Vushtrria vazhdon të mbetet në zonën e rrezikut, në vendin e dhjetë me vetëm tri pikë të grumbulluara.