Mekanizmi unik në MLS: Si e shpëtoi rregulli i veçantë Lionel Messin nga pezullimi

Lionel Messi i ka shpëtuar një pezullimi të mundshëm në kampionatin amerikan të futbollit, MLS, pavarësisht se është ndëshkuar me kartonin e pestë të verdhë këtë sezon. Kapiteni i Inter Miamit u ndëshkua gjatë barazimit 2-2 kundër FC Cincinnatit, duke ngritur shqetësime mes mbështetësve se ai mund të mungonte në takimin e radhës. Megjithatë, në shpëtim të yllit argjentinas ka ardhur një rregull specifik i këtij kampionati. Bëhet fjalë për mekanizmin e njohur si ‘Good Behavior Incentive’ (Nxitja për sjellje të mirë), i cili synon të shpërblejë lojtarët që arrijnë të zhvillojnë disa ndeshje radhazi pa u ndëshkuar me karton të verdhë apo pa rënë pre e shkeljeve të tjera disiplinore. Ky rregull përcakton se për çdo seri prej pesë takimesh rresht pa masa disiplinore, një karton i verdhë fshihet nga regjistri zyrtar i lojtarit. Ky lehtësim mund të aplikohet deri në tri herë përgjatë fazës së rregullt të sezonit. Messi e kishte shfrytëzuar këtë mundësi edhe në dy raste të mëparshme. Fillimisht, ai kompletoi pesë ndeshje pa ndëshkim në periudhën mes sfidave ndaj Orlando City-t dhe Nashville. Më vonë, fituesi i Topit të Artë regjistroi një ecuri prej dhjetë ndeshjesh pa marrë kartonë, mes ndëshkimit kundër Nashville dhe atij ndaj Atlanta-s. Për rrjedhojë, pavarësisht se kartoni i marrë ndaj Cincinnatit shënonte të pestin në fushën e blertë, në bilancin zyrtar disiplinor të kapitenit të Inter Miamit llogariten vetëm tre kartonë të verdhë. Falë kësaj dinamike, Messi nuk do të përballet me asnjë ndeshje pezullimi dhe do të jetë plotësisht i gatshëm për sfidën e radhës kundër New England Revolution, e cila do të zhvillohet këtë të diel në kuadër të javës së 33-të të MLS-së. Një praktikë e tillë mund të duket e pazakontë për standardet e futbollit evropian, por në futbollin amerikan ajo i ka siguruar Messit mundësinë për të shmangur dënimin, duke u shpërblyer për disiplinën e treguar në duelet e mëparshme.