Dita e 19-të e revoltës: Studentët dhe pedagogët rikthehen në protestë para Ministrisë së Arsimit

Për të 19-të ditë me radhë, studentë, pedagogë dhe qytetarë janë bashkuar në një tubim para godinës së Ministrisë së Arsimit, duke vijuar kështu valën e protestave që kërkojnë largimin e klasës politike, dorëheqjen e qeverisë, si dhe përmirësimin e kushteve të arsimit dhe strehimit. Të mbledhur në Rrugën e Durrësit, protestuesit kanë zhvilluar një manifestim të qetë, ndryshe nga tensionet dhe përplasjet e regjistruara gjatë ditëve të kaluara. Për shkak të tubimit, qarkullimi i automjeteve në këtë aks është bllokuar dhe devijuar, ndërkohë që forcat e policisë kanë krijuar një kordon sigurie përreth institucionit. Pedagogët, të cilët kanë ndërprerë procesin mësimor për t'u solidarizuar me të rinjtë, mbështesin kërkesat për dorëheqjen e kryeministrit Edi Rama. Nga ana e saj, Policia e Shtetit ka marrë masa shtesë për mbarëvajtjen e rendit, duke pozicionuar edhe një autobot uji pranë Kryesisë së Kuvendit. Ndërkohë, deputetë dhe mbështetës të Partisë Demokratike janë nisur në marshim drejt Ministrisë së Arsimit për t'iu bashkuar protestës. Megjithatë, nga radhët e studentëve ka pasur rezistencë dhe distancim ndaj pranisë së politikanëve të opozitës. “Kjo protestë është e popullit, ai që nuk është i mirëpritur është një person që vetë ekzistenca e tij simbolizon një parti. Nuk duam persona që janë simbol i partive politike që na kanë rrënuar ndër vite”, u shpreh një prej të rinjve pjesëmarrës në këtë tubim në Tiranë.