Kryeministri Kurti kërkon ndëshkim penal për zyrtarët neglizhentë pas vrasjes tragjike të Arlinda Zekajt

Kryeministri i Republikës së Kosovës, Albin Kurti, ka kërkuar masa të rrepta disiplinore dhe ndjekje penale ndaj të gjithë punonjësve të institucioneve që kanë treguar papërgjegjësi dhe neglizhencë në trajtimin e rastit të vrasjes së Arlinda Zekajt. Gjatë fjalës së tij në mbledhjen e 64-të të Këshillit të Përgjithshëm, kreu i ekzekutivit vuri në dukje se ngjarja tragjike e Arlindës dëshmon hapur se gratë, pavarësisht se ndjekin çdo procedurë ligjore, denoncojnë dhunën dhe kërkojnë ndihmë nga shteti, përsëri mbeten të pambrojtura dhe të rrezikuara. “Vrasja e Arlinda Zekajt na ka përballur edhe një herë me një të vërtetë të rëndë se një grua mund të ndjekë të gjitha rrugët që i parasheh ligji, të denoncojë dhunën, të kërkojë mbrojtje, madje të paralajmërojë me shkrim se i rrezikohet jeta dhe prapë të përfundojë e vrarë. Arlinda bëri atë që institucionet kërkojnë gratë ta bëjnë kur përballen me dhunë”, u shpreh Kurti. Shefi i Qeverisë ritheksoi se do të angazhohet me seriozitet maksimal që secili zyrtar që ka dështuar në kryerjen e detyrës të mbajë përgjegjësi para ligjit. “Me këtë rast, e ritheksoj se do të angazhohemi deri në fund që secili zyrtar përgjegjës që nuk e ka kryer detyrën të japë përgjegjësi, jo vetëm disiplinore, por edhe penale. Secili përgjegjës dhe secila përgjegjësi e secilës hallkë duhet të hetohet. Kushdo që ka neglizhuar punën apo ka bërë shkelje të detyrimeve ligjore duhet të japë përgjegjësi dhe do të përballet me masa disiplinore dhe penale”, deklaroi ai. Në fjalën e tij, Kurti trajtoi gjithashtu ndikimin e dëmshëm të mendësisë patriarkale në shoqëri, duke theksuar se ajo vazhdon ta trajtojë gruan si pronë, ndërsa vendimin e saj për t'u shkëputur nga një lidhje e konsideron si fyerje ndaj autoritetit mashkullor. “Kjo mendësi nuk ndryshon vetëm me ligje, ajo kërkon përballje të vazhdueshme në familje, në shkolla, në institucione dhe brenda vetë organizimeve e subjekteve tona politike”, u shpreh ai. Më tej, kryeministri përmendi domosdoshmërinë e reformave rrënjësore në sistemin arsimor, duke nënvizuar se ndërgjegjësimi për barazinë, respektin reciprok dhe zgjidhjen paqësore të konflikteve duhet të nisë që nga mosha e hershme. “Nuk mund t'i edukojmë vajzat që të jenë të dëgjueshme e të durueshme, ndërsa djemtë që të jenë, patjetër, dominues. Këto role të trashëguara duhet t'i shqyrtojmë me guxim, edhe në tekstet shkollore, edhe në mënyrën se si i edukojmë fëmijët”, shtoi Kurti. Në përmbyllje, kreu i ekzekutivit vlerësoi se luftimi i femicidit kërkon ndërtimin e politikave të mirëfillta arsimore, ekonomike dhe sociale, të cilat synojnë fuqizimin dhe pavarësimin e gjinisë femërore. “Duhet të fillojmë nga mënyra se si i edukojmë fëmijët, si i ndajmë përgjegjësitë brenda familjes, si u garantojmë grave të drejtat pronësore dhe si u mundësojmë atyre pavarësi ekonomike. Barazia gjinore duhet ta luftojë pabarazinë edhe shoqërore, dhe ajo duhet të dëshmohet në vendimet që marrim, në politikat që zbatojmë dhe mënyrën se si ne i mbrojmë gratë kur rrezikohet jeta, meqenëse barazia gjinore ndodhet në themelet e asaj shoqërie”, përfundoi Kurti.