Icardi paralajmëron rikthimin e bujshëm në Serie A: Më mungon Italia

Sulmuesi argjentinas Mauro Icardi, i cili aktualisht është lojtar i lirë që prej përfundimit të aventurës së tij me Galatasarayn në Turqi gjatë kësaj vere, ka lënë të kuptohet se është i hapur për një rikthim në futbollin italian. Gjatë një interviste të dhënë së fundmi për gazetën prestigjioze “La Repubblica”, 33-vjeçari ka shprehur hapur ambicjen e tij për të veshur sërish fanellën e një skuadre në Serie A, kampionat ku ka lënë kujtime të pashlyeshme kryesisht me fanellën e Interit. “Unë stërvitem me intensitet maksimal për t'i dhënë një përgjigje në fushë atyre që mendojnë se karriera ime ka perënduar. Ëndërroj që një ditë të kthehem të luaj në Itali”, ka deklaruar sulmuesi. Duke iu referuar të kaluarës së tij në Milano, Icardi është ndalur edhe te krisja e marrëdhënieve dikur: “Heqja e shiritit të kapitenit më ka lënduar shumë. Pranoj se disa situata i kam menaxhuar keq, por sot jam pjekur dhe do t'i shihja gjërat me tjetër sy. Jam rritur”.. Gjatë gjashtë viteve të kaluara me zikaltrit, argjentinasi ka lënë gjurmë të pashlyeshme statistikisht, duke regjistruar 219 paraqitje zyrtare, ku ka arritur të tundë rrjetën 124 herë dhe të dhurojë 29 asistime për shokët e skuadrës, pavarësisht se aventura e tij në Milano u mbyll pa fituar asnjë trofe zyrtar. Për më tepër, kujtojmë se gjatë periudhës kur ishte lider i sulmit interist, Icardi ishte kthyer në një realitet tmerrues për mbrojtjet e Juventusit dhe Milanit, duke u shndërruar në makthin më të madh të dy rivalëve historikë të klubit milanez në Serie A.