Nga premtimi i transportit falas te shtrenjtimi i biletave: Mustafi kërkon llogari në Kumanovë

Nga zotimi për ta mbajtur transportin publik falas, te nisma për rritjen e çmimit të biletave. Ky ndryshim drastik qasjeje ka ngjallur reagime të ashpra nga ana e këshilltarit të AKI-së, Huzeir Mustafi, i cili e ka ngritur këtë çështje gjatë seancës së 19-të të Këshillit të Komunës së Kumanovës. Ai e ka cilësuar këtë propozim si një barrë shtesë për ekonomitë familjare dhe si një shkelje të hapur të premtimeve të dhëna gjatë fushatës zgjedhore. Mustafi kujtoi se transporti pa pagesë kishte qenë pika kryesore dhe e para në programin e kryetarit aktual, por që sipas tij u ndërpre menjëherë pas zgjedhjeve, ndërsa tashmë qytetarëve po u faturohet një kosto më e lartë udhëtimi. “Në vend që qytetarët të shfrytëzojnë një të mirë që u ishte premtuar dhe me të cilën keni marrë vota, sot kemi propozim për rritjen e çmimeve të transportit publik”, deklaroi ai gjatë fjalës së tij. Këshilltari i AKI-së u shpreh se ky premtim i pambajtur mund të ketë orientuar vullnetin e votuesve, sidomos në zonat rurale. Sipas tij, elektorati do të kishte reflektuar ndryshe sikur gjatë periudhës zgjedhore të ishte paralajmëruar një shtrenjtim i tillë i shërbimeve komunale. Duke i drejtuar pyetje udhëheqëses së sektorit përgjegjës për këtë prezantim, Mustafi drejtoi kritika edhe ndaj mungesës së kryetarit në mbrojtjen e nismave që prekin drejtpërdrejt interesat e banorëve, duke theksuar se barra e shpjegimit nuk duhet t'i lihet vetëm administratës. Në vijim të diskutimit, ai vuri theksin te cilësia e dobët e shërbimeve të transportit. Mustafi kërkoi llogari se çfarë risish apo përmirësimesh sjell ky propozim, duke shtuar se nuk vëren asnjë përpjekje modernizimi që mund të justifikojë këtë shpenzim shtesë për qytetarët. “Ne shohim të njëjtët autobusë që vazhdimisht qarkullojnë nëpër rrugët e qytetit. Nuk kemi autobusë të rinj, nuk ka ndonjë standard të ri me të cilin qytetarët ndoshta do ta pranonin këtë vendim. Gjithçka është e vjetër, vetëm çmimet janë të reja”, theksoi ai. Në përmbyllje, përfaqësuesi i AKI-së u shpreh se çdo ngritje e tarifave duhet të shoqërohet me transparencë dhe argumente të qarta për investimet e reja në terren. Ai refuzoi që qytetarëve t'u rëndohet xhepi pa u ofruar kushte më të mira udhëtimi. “Ne nuk e përkrahim këtë propozim, sepse vlerësojmë se vendime të tilla e dëmtojnë rëndë buxhetin familjar të qytetarëve të Kumanovës”, përfundoi Mustafi.