Manchester United hedh sytë nga ylli i Barcelonës, synon transferimin e bujshëm

Manchester United ka shfaqur interesim konkret për mesfushorin ofensiv të Barcelonës, Fermín López, pasi gjiganti anglez synon të shtojë opsionet në repartin e sulmit gjatë afatit kalimtar të ardhshëm. Sipas mediave britanike, ky zhvillim vjen si pasojë e dëmtimit të sulmuesit Benjamin Šeško, mungesa e të cilit pritet të jetë e gjatë. Për rrjedhojë, drejtuesit e klubit nga Old Trafford janë vënë në kërkim të alternativave të reja, duke e përfshirë 23-vjeçarin spanjoll në listën e ngushtë të dëshirave. Megjithatë, arritja e kësaj marrëveshjeje nuk do të jetë e thjeshtë. López luan një rol kyç në skemat e skuadrës katalunase dhe është i lidhur me një kontratë afatgjatë që skadon në vitin 2031. Përveç interesimit nga “Djajtë e Kuq”, për shërbimet e tij po rivalizojnë edhe dy gjigantë të tjerë europianë, Chelsea dhe Paris Saint-Germain, ndërkohë që kartoni i lojtarit vlerësohet rreth 70 milionë funte. Aktualisht nuk ka bisedime zyrtare mes palëve, por Manchester United po e vlerëson seriozisht mundësinë e nisjes së një tentative për të siguruar firmën e tij në kuadër të projektit për riforcimin e skuadrës.