Të shpallur në kërkim nga Gjermania, kapen në Morinë dy kosovarët e dënuar me nga 15 vjet burg

Operacionet e Policisë Kufitare në pikën e kalimit të Morinës kanë çuar në arrestimin e dy të rinjve nga Kosova, të cilët ishin shpallur në kërkim ndërkombëtar nga drejtësia gjermane. Në pranga kanë rënë një 22-vjeçar dhe një 24-vjeçar, të dy banues në Vushtrri, të cilët rezultojnë se janë dënuar nga Gjykata e Erfurtit më 1 qershor 2026 me nga 15 vjet heqje lirie secili, për veprat penale të vjedhjes me dhunë në bashkëpunim dhe dëmtimit të pronës. Sipas informacionit zyrtar nga strukturat e rendit, ndalimi i tyre u realizua në kuadër të operacionit policor të koduar “Wanted”, falë kontrolleve intensive dhe analizës së riskut në kufi. Dy shtetasit kosovarë ishin shpallur në kërkim ndërkombëtar përmes Interpol Wiesbaden. Tashmë, strukturat e Interpol Tiranës janë duke bashkëpunuar ngushtë me homologët gjermanë për të përmbyllur procedurat e nevojshme ligjore për ekstradimin e dy të rinjve drejt Gjermanisë.