Krimi i rëndë në Athinë: Policia greke zbardh ngjarjen dhe prangos 48-vjeçarin shqiptar Ilian Kola

Autoritetet policore në shtetin fqinj kanë arritur të zbardhin plotësisht rrethanat e një vrasjeje të ndodhur më 24 korrik të këtij viti, në lagjen 'Galaci' të Athinës. Sipas të dhënave zyrtare nga hetuesit, si autor i dyshuar i këtij krimi është identifikuar dhe arrestuar 48-vjeçari me origjinë shqiptare, Ilian Kola. Rezulton se ai kishte njohje të mëparshme me viktimën dhe e vizitonte atë kohë pas kohe në banesë, ku kryente punë të ndryshme ose shërbime mirëmbajtjeje për të marrë në këmbim shuma të vogla parash. Motivi kryesor i ngjarjes dyshohet të jetë grabitja. Viktima gëzonte një gjendje të mirë ekonomike dhe, gjatë këqyrjes së vendngjarjes pas krimit, u konstatua se nga shtëpia e tij mungonin shuma monetare si dhe sende me vlerë.